CEBU, Philippines — Nagtagbo ang mga opisyales sa Cebu City Government ug mga representante sa mga malls ug gituki ang mahitungod sa pagbalik na unya og abli sa mga sinehan sa ilang mga establisamento.
Matud ni Cebu City Mayor Edgardo Labella ubos sa Modified General Community Quarantine gitugutan na sa pag-abli ang mga sinehan apan dinhi sa Cebu City bisan paman og duna nay pagtugot gikan sa Inter-Agency Task Force wala una nila kini tuguti sanglit istrikto nila nga ipatuman ang minimum health protocols.
Apan sigon ni Labella nga dunay request gikan sa Cebu Chamber of Commerce and Industry(CCCI) ingon man sa mga cinema operators nga moabli sila base sa health protocols nga gi-issue sa IATF nga 50 percent capacity sa sinehan.
Atol sa ilang meeting gipresentar sa mga mall representatives ang ilang himuon kun pananglitan ablihan na ang mga sinehan. Naglakip niini ang disinfection, regular nga paglimpyo kada human sa salida ug dunay mga ekipo nga ibutang aron masiguro nga matuman ang health safety. Gipangutana sab ang mga mall representative kun unsay ilang himoon ilabi na ang mga sinehan air-conditioned ug matod pa aduna sila’y ekipo para niini.
“There were other concerns pero ang importante gyud nga if we allow them to open ang minimum health protocols niya 50 percent niya duna sila’y mga safeguards nga ilang gi-institute para masiguro ang spread sa virus diha sa cinema mapungan gyud mao nay ilang assurance,” ni Labella pa. Apan si Deputy Chief Implementer sa Emergency Operation Center Konsehal Joel Garganera dili pabor nga buksan ang mga sinehan alang sa mga senior citizens.
Matud pa ni Garganera padayon ang pagkubos sa mga kaso sa Covid-19 ug nalipay sila niini maong padayon niyang giawhag ang katawhan nga dili gihapon mokompiyansa.
Apan gipasalig niya nga kun mausab ug mokubos na gyud ang mga kaso mahimong maghimo og kausaban sa mga age brackets nga tugotang makagawas. Rowena D. Capistrano/IBM (BANATNEWS)