Sinulog dance competition wagtangon, sayaw halad nalang

CEBU, Philippines — Gibutyag sa chairman sa committee sa  peace and order  sa Konseho sa Dakbayan sa Sugbo nga si Konsehal  Phillip  Zafra nga moduso siya og sugyot sa Konseho nga wagtangon na ang kompetisyon sa mga dance rituals sa umaabot nga Sinulog 2021.

Kini nunot sa pandemiya nga dala sa novel coronavirus disease nga hangtud karon wala pay epektibong bakuna nga maprotektahan ang tawo gikan niini.

Sa iyang proposal, magpadayon gihapon ang group performance apan para halad ngadto sa Balaang Bata.

Sa maong pamaagi ,dili ra mawagtang ang tradisyonal nga paghalad og sayaw nga maoy usa sa atangan sa publiko kada pangolin sa Senyor Sto. Niño. Gawas nga makadaginot sa gastos,  gibutyag ni Zafra nga mamentinar usab ang health protocols sanglit pre-recorded man ang mga dance presentations nga manukad sa tagsa-tagsa nila ka mga lugar.

“Kun ma-approve ang atong proposal,  atong awhagon ang mga nangagi nga winners nga mohalad og sayaw. Ug adto sila mosayaw sa ilang tagsa-tagsa ka mga lugar. Sa susamang higayon , ma-promote pud ang turismo sa ilang dapit,”nagkanayon si Zafra sa dihang nahinabi sa Banat News kagahapon.

Sumala pa ni Zafra nga panahon karon sa pandemya  busa importante usab ang pagdaginot.

Dugang pa niya nga angayan nga ipatigbabaw ang pagka-mainampoon ug debosyon sa mga Sugboanon ngadto sa Balaang Bata nga maoy sentro selebrasyon .

Una na nga gitinguha sa konsehal ang pagpahigayon og online presentations sa Sinulog 2021 gumikan kay dili pa gyud masiguro ang dagan sa panahon gumikan nagpadayon nga hulga sa COVID-19.

Una na nga nabalita dinhi sa Banat News sa miaging buwan ang mga pasiunang plano sa Siyudad sa Sugbo ug sa mga kaparian sa Basílica Menore del Santo Niño de Cebú alang sa mga posibleng senaryo sa pista senyor sa 2021 kun diin wagtangon nalang ang solemn procession ug hulipan ngadto sa motorkada aron malikayan ang pagdagsa sa mga tawo.

Gidasig usab ni Zafra ang publiko nga sa online novena mass nalang motambong aron maseguro ang physical distancing sa Basilica. /IBM (BANATNEWS)