CEBU, Philippines — Gisentinsiyahan og unom ngadto sa walo ka tuig nga pagkabilanggo ang kanhi direktor sa Department of Public Works and Highways (DPWH) nga si Robert Lala tungod sa anomalosong pagpalit sa kontrobersyal nga decorative lampposts nga gipamutang sa kadalanan sa Lapu-Lapu City, Cebu alang sa 2007 Association of Southeast Asian Nations (ASEAN) summit.
Sa 81-pahinang desisyon nga gipagawas niadtong Septiyembre 29, ang Sandiganbayan Sixth Division mihukom nga si Lala sad-an ug nakalapas sa Section 3 (e) of Republic Act 3019 or the Anti-Graft and Corrupt Practices Act.
Lakip sa nakalapas niini silang Pureza Fernandez, kanhi DPWH-Region 7 officer-in-charge chief of the Maintenance Division ug si Agustinito Hermoso, kanhi sakop sa Bids and Awards Committee (BAC).
Gawas kanila, apil sa nakombikto ang mga pribadong tawo nga silang Gerardo Surla, board chairman sa GAMPIK Construction and Development Inc.
Silang tanan gisilotan og unom ngadto sa walo ka tuig nga pagkabilanggo ug accessory penalty nga perpetual disqualification from public office. Ang maong kaso gipasaka sa Office of the Ombudsman niadtong 2008, human nga nakwestyon ang pag-award sa P35.6-milyones nga kontrata ngadto sa GAMPIK niadtong Marso 2007 aron maoy mo- supply ug motaud og traffic signal lights ingon man decorative lampposts sa mga dagkong karsada sa Lapu-Lapu City.
Sumala pa sa ombudsman anomaloso ang pag-award sa kontrata ngadto sa GAMPIK tungod kay walay nahitbaong competitive bidding nga dakong kalapasan sa RA 9184 o Government Procurement Reform Act.
Nahibaw-an sab sa ombudsman nga ang kontrata gi-overpriced og P12.6 milyones.
Giklaro hinuon sa Sixth Division nga walay kwartang napagawas ang gobiyerno sa maong anomalosong kontrata kay napahunong man kini ug wala mabayari ang GAMPIK.. Nakombikto sila tungod kay naestablisar sa prosekusyon dunay nahatag nga “unwarranted benefit, advantage and preference” ang tulo ka mga opisyales sa DPWH kang Surla. “The Memorandum of Understanding dated 22 November 2006, which was the brainchild of accused Hermoso and duly signed by accused Lala and Fernandez in behalf of DPWH Region 7, allowed GAMPIK to start with the project prior to the scheduled bidding, with a guarantee that it will be paid for the work done,” matud pa sa desisyon sa korte.
“In effect, GAMPIK was already assured that it will be declared the winning bidder. That GAMPIK will get the project was already a done deal and the bidding held on 28 November 2006 was just formality,” dugang pa niini.
Sa laing bahin, sa mao gihapong desisyon, ang Second Division mi- acquit nilang Lala, Fernandez, Hermoso ug unom pa ka kanhi opisyales sa DPWH, ingon man kang Surla, sa laing graft case may kalabotan sa pag- award sab sa P24.97 milyones nga kontrata ngadto sa GAMPIK sa susamang proyekto diha sa Mandaue City. Matud sa Second Division way ebidensya nga ang kontrata overpriced og P17.48 milyones. Philstar.com/IBM