Dul-an P10 milyones marijuana, imported kush nasakmit

CEBU, Philippines — Dul-an sa P10 milyones nga kantidad sa marijuana ug imported nga giprosesong marijuana nga gitawag og “kush” ang nasakmit sa duha ka managlahing operasyon sa mga otoridad.

Sa operasyon nga gihimo didto sa Sitio Udlom, sa utlana sa Brgy. Cabasiangan ug Sunog sa lungsod sa Balamban nalarot sa hiniusang pwersa sa Cebu Provincial Police Office-PIU; Cebu City Police Office-1st PMFC, Naval Forces Central ug ug Philippine Drug Enforcement Agency-7 ang kapin sa 21 mil ka punoan sa marijuana.  Duha ka plantasyon ang ilang nadiskubrehan nga maayong pagkatanom sa mga illegal nga tanom. Hinuon nailhan na kun kinsa ang nananom niini.

Gibana-banang P8,480,000 ang balor sa maong marijuana nga gidauban diha gihapon sa lugar. Sa laing operasyon, nasakmit sa mga otoridad ang gibanabanang P1.5 milyon nga balor sa imported Marijuana Kush sa gipahigayong hiniusang operation sa mga tinugyanan sa PDEA-7, NAIA-IADTG, CCPO CIU, Bureau of Customs 7-CIIS atbang sa usa ka high-end condominium sa may Barangay Banilad sa dakbayan sa Sugbo niadtong Miyerkules sa hapon.

Ang nasikop mao si Jan Robert Perales, 24, nagpuyo sa usa ka condominium sa Barangay Zapatera.

Si PDEA7 director Levi Ortiz nitug-an nga ilang susihon nga ang maong illegal nga drugas gikan pa sa nasud sa Espanya ug mga adunahan lang ang mogamit niini. /IBM (BANATNEWS)