CEBU, Philippines — Mga barangay sa Cebu City nga pabiling adunay mga aktibong kaso sa novel coronavirus disease, ang seryusong pagtuman sa minimum health protocols wala gihapon motuhop sa hunahuna sa pipila ka mga residente sumala pa sa kapolisan.
Si Cebu City Police Office Director Colonel Josefino Ligan miingon nga sa dihang ilang gilibot ang mga barangay nga dunay daghang aktibong kaso daghan silang nakit-ang mga tawong wala magsunod sa health protocols.
Ang kapolisan nga nanuroy wala magsuot og uniporme maong wala makabantay ang mga tawo sa ilang presensya.
Ang mga barangay nga matud pa ni Ligan ilang gisuroy tungod dunay daghang aktibong kaso mao ang Barangay Apas, Guadalupe ug Lahug nga sakop sa North Cluster Area.
Bisan sa merkado ug daplin sa mga karsada adunay mga tawong magsuot og face mask kutob ra sa suwang.
Si Ligan mipasidaan nga nga wala mawala ang virus. Ang Cebu City ubos paman sa modified general community quarantine pabilin ang mga restriksyon.
Apan para kang Ligan, mas maayo gyud unta nga batasanon na karon sa katawhan ang pagsunod sa minimum health protocols tungod kay para gihapon kini sa ilang kaluwasan aron dili maigo sa Covid-19.
Wala silay gidakop atol sa ilang inspeksyon sa maong mga barangay apan si Ligan miingon nga balikon nila ang maong dapit apan ning tungora manakop na sila niadtong wala motuman sa mga restrictions o health protocols ug tinud-on nila nga mapasakaan sila og kaso.
“Rest assured we will be arresting you, we will be filing cases against you for disobedience. On that respect, di gihapon mo magpatuo, pito na ta ka buwan ani, ang inyohang panghuna-huna wala gihapon molinyada aning sige’g gihimo sa gobiyerno,”bahad pa ni Ligan.
Giangkon niini nga usa sa mga hagit sa kapulisan sa siyudad kun unsaon pagtanom sa hunahuna sa tanan nga ang virus naa pa gihapon u gang pagsunod sa minimum health standards maoy makasalbar kanila nga di matakdan. /IBM (BANATNEWS)