Mobile vet clinic moserbisyo na sa kabarangayan

CEBU, Philippines — Gipaabot nga molibot na sa nagkadaiyang barangay sa Dakbayan sa Sugbo ang mobile veterinary clinic sa kagamhanan sa dakbayan.

Suma pa ni Dr. Jessica Maribojoc, ang head sa Animal Health Division sa siyudad nga nagkantindad og P3 million ang maong sakyanan.

Matud pa niya ang Siyudad sa Sugbo maoy labing una nga local government unit nga nakabaton og mobile veterinary clinic nga maoy tulay nga mapaspasan ang ilang pagpangalagad sa 80 ka mga barangay.

Niadtong miaging adlaw, pormal na nga natunol ang maong unit ngadto sa kagamhanan sa dakbayan.

Suma ni Dr. Maribojoc nga dili basta -basta ang maong mobile clinic gumikan kay gawas sa pagkapon ug paglaygit, mahimo usab sila mohatag og vaccine sa mga hayop ug duna usab kini operation room ingon man duna usab silay saktong gidaghananon sa mga veterinarian.

“Tungod sa mobile clinic, daghan ta og maalagaran nga mga hayop kay naka-karga naman ang tanan natong gamit ug sayon nalang kaayo ang pag-transfer niini sa lain napud nga baranggay,” matud pa ni Maribojoc.

Ang mga sakop sa animal health division makig-alayon sa mga opisyales sa barangay alang sa schedule sa ilang pagbisita. /MEL (BANATNEWS)