1 patay, usa angol sa pagpamusil sa Balamban

CEBU, Philippines — Usa ang patay ug usa ang angol sa nahitabong pagpamusil sa may Sitio Lacdon, Barangay Prenza, Lungsod sa Balamban, Martes sa kadlawon.

Ang nakalas naila nga si Dionesio Otapil, minyo, mananambal, taga Linggatong, Barangay Vito sa maong lungsod ug ang naangol mao si Vingie Candia, 26 anyos, ulitawo.

Nasayran gikan ni Police Master Sergeant Roldan Balingbing, Desk Officer sa Balamban Police Station, nga ang mga biktima giingong sakay sa ilang motor gikan sa Barangay Vito padulong unta ngadto sa Balamban Proper sa dihang gipamusil sa wala mailhing mamumuno nga nagsakay usab og motorsiklo.

Si Otapil namatay diha diha samtang si Candia nga nakaangkon ug samad pinusilan sa iyang likod ug dali nga gidala sa tambalanan.

Nakuha sa crimescene ang kabhang sa 45 kalibre nga armas ug mga personal nga kagamitan sa mga biktima.Wa pa masuta sa kapolisan ang motibo sa maong pagpamusil.

Samtang sa laing bahin malaumon ang kapolisan sa Dakbayan sa Lapu-lapu nga aduna nay mga saksi nga motumaw aron masulbad ang kamatayon ni Mactan Barangay Konsehal Zandro Augusto.

Si Police Colonel Clarito Baja ang direktor sa LCPO nag-awhag niadtong mga tawo nga nakasaksi sa krimen sa pagduol sa ilang buhatan aron matabangan nga masulbad ang kaso.

Samtang si Baja miingon nga ang lakang ni Mayor Chan nga paghatag og reward nga P1 milyon ka pesos makatabang sa pagkuha og kasayuran sa pagsulbad sa pagpatay ni Konsehal Augusto.

Samtang gihangop usab ni Kongresista Paz Radaza ang maong lakang ni Mayor Chan ug nanghinaut ang kongresista nga mahatagan og kasulbaran ang maong krimen. Romeo T. Limpangog/MEL (BANATNEWS)