Gullas mohangyo og hinabang alang sa mga nasunogan

CEBU, Philippines — Ang mga opisyal sa Dakbayan sa Talisay pinangulohan ni Mayor Gerald Anthony “Samsam” Gullas Jr. nitunol kini og mga hinabang ngadto sa mga pamilyang nasunogan sa Barangay Tanke.

Nikabat ngadto sa 100 ka pamilya diha sa Sitio Kilawan sa nahisgutang barangay ang naapektohan sa nahitabong sunog niadtong Biyernes sa buntag ug gibana-banang niabot ngadto sa P1 milyon ang danyos niini.

Si Gullas nihatag kini og sulod sa upat ka adlaw nga libreng pagkaon sa mga naapektohan samtang gihikay pa sa Department of Social Welfare and Development (DSWD) ang pinansiyal nga hinabang.

Matud ni Gullas nga mohangyo siya og hinabang kang Gobernador Gwendolyn Garcia ug sa iyang apohan nga si Kongresista Eduardo Gullas alang sa mga nasunogan.

Nunot niini, si Gullas nihangop tungod kay ni-commit si Senador Bong Go nga mohatag usab og ayuda.

Samtang si Konsehal Rodulfo Cabigas nibisita usab kini sa mga nasunogan ug si Konsehal Richard Francis Aznar nidala sa iyang mobile kitchen ug nanghatag og lugaw ngadto sa mga tawo.

Ang opisyales sa siyudad niawhag usab sa mga adunay matabang nga unta mopaambit kini sa ilang grasya ngadto sa mga nanginahanglan.

Sa laing bahin, niabot ngadto sa P750 mil ang danyos sa sunog nga niulbo diha sa  Sitio Kolo, Barangay Mambaling, Dakbayan sa Sugbo kagahapon sa kadlawon.

Ang kayo sa sunog giingong nagsugod sa balay nga gipuy-an ni Charlie Mino apan ang kabomberohan mopahigayon pa niini og imbestigasyon.

Lakip nga nasunog ang pipila ka mga sakyanan nga pasaheroan hinuon walay gikatahong naangol sa maong insidente. —Rowena D. Capistrano/BDB (BANATNEWS)