Oplan Limpyo sa Talisay, daghang nadakpan

CEBU, Philippines — Dul-an sa tunga sa milyon ka pesos nga kantidad sa shabu ang nasakmit sa kapulisan sa Dakbayan sa Talisay sa sunod-sunod nga operasyon sa managlahing lugar sud sa duha ka adlaw.

Gisugdan ang operasyon niadtong Sabado sa gabie ug natapos kagahapon sa kaadlawon.  Unang buy bust operation nasikop si Emmanuel Dejan nga nakuhaan og 0.63 gramos nga shabu.

Si Marvin Deiparine nakuhaan sab og 5.33 gramos nga shabu. Nadakpan sab si Jerby Cabanes nga usa ka high value individual (HVI) nga nasakmitan og drugas nga nitimbang og 6.02 gramos. Nisunod sab dayon sila si John Paul Cabaluna ug Cindy Marie Amoratan. Si Dexter Cabalda nga HVI nasakmitan sab og shabu nga nitimbang og 30.54 gramos.

Samtang laing HVI nga nasikop mao sila si Junrey Radan, Ryan Avillanida ug si Christusio Legaspina. Sa kinatibuk-an niabot sa 56.98 gramos ang timbang sa shabu nga nasakmit gikan sa mga dinakpan nga adunay balor nga P401,416.

Apil sa grupo nga nadakpan kagahapong adlawa mao si Marianita Java Villarmea, 47. Sila nasikop sa  Barangay Bulacao, Talisay City ug nakuhaan og 8.68 gramong gidudahang shabu. Matud Police Major Gerard Ace Pelare,  hepe sa Talisay City Police Station ang subject gyud sa operasyon mao si Villarmea kay baniog kaayo ang ngalan niini sa pagpamaligya og illegal nga drugas sa maong dapit.

“Suspect was consistently subject of reports on involvement in illegal drugs trade,” si Pelare miingon.

Samtang si Avillanida, nga tig refill og tubig diha sa Barangay Tabunok ug delivery boy sab si Legaspina, gikan Barangay Bulacao giingong mga bata-bata ni Villarmea sa distribusyon.

Ang mga dinakpan gibalhug sa bilangguan nga gikatakdang pasakaan og kaso.

Samtang si Police Colonel Aladdin Collado, ang bag-ong Cebu Police Provincial Office (CPPO) niduaw sa Talisay Police Station ug nakigtabitabi sa pipila ka dinakpan.

Si Collado mipahimangno kanila magbalik-balik lang gyud sila sa prisohan kun magsigi gihapon sila og lambigit sa illegal nga drugas ug mga krimen.

“Dahil nakagawa kayo ng kasalanan, pagbayaran nyo,”pagmaymay pang Collado.

Si Pelare nagtuo nga konektado tanan ang ilang mga dinakpan sa pagpamaligya og illegal nga drugas.

“We conducted a Oplan Limpyo Talisay as part of our main strategy against illegal drugs and we arrested ten Illegal drug suspects for various offenses under RA 9165,so they will be charged accordingly tomorrow,” si Pelare miingon.

“This is also to show that even in pandemic situation, your police force will still be on the top of their performance of  their main function which is the law enforcement,” dugang pa niya.

Giangkon ni Pelare nga dili gyud nila tanan mabantayan apan pinaagi niining mga operasyon duna gyuy motagam kanila tungod kay dili man sab mohunong ang mga polis sa pagpanakop sa mga malapason.

“We cannot assure that there will be no illegal gambling problem in Talisay, what we can assure is we will not stop in arresting them, it is the partnership of the PNP and Community, kung dili pud motug-an ang community, how would we know?” dugang a niya.

Sa pikas bahin, sa Lungsod sa Tuburan usa ka Andrew Alegado gisita tungod sa paglapas sa curfew apan sa pagsiksik kaniya nakuhaan kini og mga liso sa marijuana nga gikatahong gisulod sa iyang bulsa.

Si Police Sergeant Anthony Zamora sa Tuburan Police Station miingon nga si Alegado ilang gisita kay naglaroy-laroy kaadlawong dako diha sa Barangay Singko  sa maong lungsod.  Ang lungsod adunay curfew nga gipatuman.

Apan imbes mopatuo nagmagahi hinuon kini hinungdan nga gidakop ug girekisa  ug diha nadiskubrehan ang mga liso sa bulsa niini. –Iris Hazel Mascardo, Romeo Limpangog/IBM (BANATNEWS)