Traditional jeep makabiyahe na gawas sa Cebu City, Mandaue

CEBU, Philippines — Makabalik na sa pagpamasahero ang mga traditional public utility jeepneys (TPUJ) sa Lalawigan sa Sugbo gawas lang sa Dakbayan sa Sugbo ug Mandaue.

Kini ang gipahibawo sa Land Transportation Franchising and Regulatory Board 7.

Si LTFRB-7 Director Eduardo Montealto Jr. niingon nga ang maong pagtugot base usab sa gikasabotan sa Regional Inter-Agency Task Force (AITF) 7.

Matud ni Montealto nga ang mga TPUJ nga mobalik na sa ilang pagbiyahe ang gitugotan sa lugar nga ubos sa modified general community quarantine (MGCQ).

Kinahanglan nga makakuha sila og special permit ug makasumiter usab sa valid Certificate of Public Convenience (CPC) ug registration nga iduso ngadto sa Land Transportation Office alang sa road worthiness inspection.

Si Montealto niingon nga ang mga jeepney operators kinahanglan nga adunay passenger insurance policy ug magbutang og plastic barrier sa paglikay nga malagpotan og laway ang drayber ug mga pasahero.

Higpit usab nga ipatuman sa LTFRB-7 ang social distancing policy ngadto sa mga pasahero aron paglikay sa pagkuyanap sa coronavirus. /GMR (BANATNEWS)