Mga Brgy tanod bansayon sa CCPO

CEBU, Philippines — Bansayon sa Cebu City Police Office (CCPO) ang mga barangay tanod sa mga intervention techniques subay sa hangyo sa Department of Interior and Local Government (DILG) karon nga gipapauli na sa ilang mga lugar ang mga augmentation forces nga nitabang pagbantay sa siyudad.

Matud ni Police Lieutenant Colonel Wilbert Parilla, deputy director alang sa operasyon sa CCPO, ang pwersa sa Barangay Peace and Safety Officer (BPSO) magamit sa pagpatuman sa health protocol ug uban pang mga guidelines alang sa COVID-19.

“Nagkaestorya mi sa DILG na aside from those mga equipment nga gihatag nato sa mga barangay tanod, ato sa sila i- equipped sa knowledge and skills, naa to silay gi propose na schedule for intervention technique, katong mga hand-cuffing,” matud ni Parilla.

Subay niini, giingon ni Parilla nga ila na karon gihan-ay ang mga schedule sa mga barangay alang sa training.

Una na nga na report nga ang mga gi augment nga police personnel gikan sa mga silingan nga mga police units and offices gikatakdang i-recall karong adlawa, (Lunes) Agosto 31, 2020.

“Dako kaayo ang ilahang role specially karon na i- pullout na atong mga augmented personnel. Atong mga augmentation from SAF, from Region 6 and 8 and other (police) offices sa Mandaue, Lapu-Lapu and (Cebu) Province, so dako kaayo ug vacuum considering na 1,000 kapin gud na atong augmented personnel,”sigon ni Parilla.

Sa wala pa ni nga mga augmentation, kini nga mga tanod sa barangay gipatabang sa mga pulis sa CCPO sa pag-monitor sa ilang tagsatagsa ka mga barangay.

Dugang ni Parilla nga ilang mapahimuslan usab ang ilang kusog aron mapadayon ang seguridad kauban ang kapolisan sa CCPO.

Ang mga barangay tanod ang modumala sa mga Barangay Control points ug mohimo og mga rekorida.

Apan gipasidan-an ni Parilla ang mga tanod nga dili moabusar sa paghimo sa ilang trabaho ug kinahanglang pinasubay sa hustong proseso ug sa balaod ang tanan tungod kay kun makasala sila sa mga sibilyan dili magpanuko ang CCPO pag-aresto kanila. /IBM (BANATNEWS)