NBI-7 nagsugod og imbestigar sa PhilHealth

CEBU, Philippines — Gisugdan na sa National Bureau of Investigation sa Central Visayas Regional Office (NBI-CEVRO) ang ilang imbestigasyon sa mga opisina sa Philippine Health Insurance Corporation (PhilHealth) sa rehiyon subay sa kamandoan sa ilang ulohang buhatan kalabot sa alegasyon nga anomalya sa maong ahensiya.

Sa pakighinabi kang Attorney Renan Oliva, ang bag-ong Director sa NBI-7,kini mitug-an nga nagsugod na sila sa ilang imbestigasyon subay sa kamandoan sa Department of Justice.

“The NBI was ordered nationwide to check on alleged anomalies of Philhealth, so we coordinated with COA (Commission on Audit) for first of all checking sa mga claims,sa COVID,” sigun ni Oliva.

Matud pang Oliva gitutokan nila pagsubay kun dunay mga iregularidad ang mga dokumento sa mga pasyenteng adunay kalabotan sa Covid-19 ang sakit ug kadtong mga kwestyonableng insurance claims sa mga tambalanan.

Didto sa kaulohan, adunay mga alegasyong gigigamit ang pandemiya sa iregularidad aron makapagawas og pundo ang PhilHealth. Pipila sa mga labaw sa maong insurance company sa gobiyerno ang ni-resign na sa pwesto tungatunga niining mga pasangil.

Giangkon ni Oliva nga daghang mga dokumento silang kinahanglang subayon mao nga ilaha kining bahinon ug tutokan kadtong dunay mga report bahin sa COVID-19.

Lakip sa naghimo og imbestigasyon ang mga provincial offices sa NBI-7 sa Bohol ug Negros Oriental human aduna sab silay mga nadawat nga impormasyong dunay mga iregularidad sa mga hospital didto.

Hinuon giklaro ni Oliva nga bisan wala pa gimando sa DOJ ang paghimo og imbestigasyon sa tanang regional officers sa PhilHealth, ang sanga niining buhatan dinhi sa Dakbayan sa Sugbo niduol na kanila ug nagpatabang aron ipasusi ang pipila ka mga kwestyonableng ‘insurance claims’ sa mga tambalanan diha sa ilang buhatan.

“The PhilHealth Region 7 based here in Cebu City already forwarded a request for assistance before the (national) investigation begin regarding alleged claims that they found questionable, giusa nalang namo ang directives sa national ug katong request sa local nga PhilHealth,” dugang pagpasabot ni Oliva.

Ang NBI-7 nakigtagbo na sa mga internal auditors sa PhilHealth ug sa Commission on Audit isip kabahin sa imbestigasyon.

Ang Senado adunay gihimong imbestigasyon kalabot sa giingong kurapsyon diha sa PhilHealth.

Giingong nga adunay duha ka mga Sugbuanon nga mibutyag nga nakadawat sila og mga text message gikan sa PhilHealth nga na-ingon nga sila na-admit sa tambalanan apan dili kini tinuod.

Ang giingon nga mga text message gikan sa PhilHealth mabasa:“Benefit payment notice for the members for its confinement last April 15 and 16 of this year, respectively, at Vicente Sotto Memorial Medical Center. We already paid P5,450 to your hospital. Check your billing statement to see if the same amount was deducted from your bill as PhilHealth benefit. If not, ask your hospital.” Ang mensahe aduna say nakabutang nga reference number. 

Hinuon gipasabot sa opisina sa Philhealth-7 nga ang mensaheng nadawat sa  duha ka mga Sugbuanon,  mga system-generated notifications kini. – Iris Hazel Mascardo/IBM

Cebu City dunay 22 ka bag-ong kaso

Moabot og 65 ka bag-ong kaso sa Covid-19 ang natala sa tibook Central Visayas sa Agosto 29, 2020 hinongdan nga anaa sa 2, 219 ang active cases lukop rehiyon.

Sa datus sa Department of Health (DOH-7), 22 ang natala sa Cebu City, 10 sa Mandaue, siyam sa Lapu-Lapu, 17 sa Probinsya sa Sugbo, tagtulo sa Talisay ug Minglanilla ug usa usab ang sa Consolacion.

Padayon sab ang pagdaghan sa nangaayo sa Covid-19  ug niabot na kini og 15, 479 human nga 38 ang nadugang sa recoveries.

Walo (8) niini ang sa Cebu City, unom sa Mandaue City, 11 sa Lapu-Lapu,unom (6) sa Cebu Province ug pito (7) sa Consolacion.

Ang mga namatay nisaka ngadto sa 1, 103 human nadugangan og usa. Ang cumulative cases sa Covid-19 sa tibuok Central Visayas niabot sa 18, 801. /IBM (BANATNEWS)