CEBU, Philippines — Dili mominus P16,000 ang nakuha sa usa ka kawatan nga nilungkab sa duha ka buhatan sa Kapitolyo alas 12 pasado sa tungang gabii kagahapon.
Sa report sa dyLA News, si Police Colonel Roderick Mariano, direktor sa Cebu Provincial Police Office, nagkanayon nga nakita sa CCTV sa Kapitolyo ang gamayon nga lalaki nga nigawas sa opisina sa Provincial Social Welfare and Development Office (PSWDO) ug nisulod sa Provincial Accounting Office.
Matud pa walay nakuha sa PSWDO ug didto nakuha ang kwarta sa Accounting Office nga gituohan gipanag-iya sa mga empleyado sa Kapitolyo.
Sa inisyal nga imbestigasyon sa kapolisan, gituohan nga didto niagi ang suspek sa guba nga butanganan sa aircon sa PSWDO nga gitabonan ra.
Ang PSWDO anaa kini nahimutang sa wala nga bahin samtang ang Accounting Office naa sa tuo ug ubos nga bahin sa Executive Building sa Cebu Provincial Capitol.
Gitan-aw sa kapolisan ang posibleng lugak nga seguridad sa Kapitolyo. /GMR (BANATNEWS)