P1 milyones balor sa shabu nasakmit

CEBU, Philippines — Lain na sab gipasanginlang tigpayuhot sa drugas ang nadakpan sa mga otoridad ug sama sa mga nahaunang dinakpan, moabot gihapon sa usa ka milyon ka pesos nga gidudahang shabu ang nasakmit. Sa mga nanglabay nga mga adlaw kinilo nga shabu ang nangasakmit.

Timailhan lang nga abunda ug dinaghan na ang transaksyon sa sindikato sa illegal nga drugas dinhi sa Dakbayan sa Sugbo.

Niadtong Domingo sa hapon, nadakpan ang high-value individual nga si Manuel Orongan, 37, sa gipahigayon nga buy-bust operation sa Sitio Lawis, Barangay  Mambaling.

Sigon sa hepe sa Mambaling Police Station nga si Police Captain Renz Talosig, ang dinakpan duha ka semana na nilang gimonitor ug kini nag-operate diha sa maong barangay ug mga silingang dapit.

Apan sama gihapon sa mga una ng nadakpan, wala kini motug-an kun kang kinsa gikan ang iyang supply sa shabu.

 “Napugos ra daw sya kay walay trabaho tungod sa pandemic,” sigon ni Talosig pagkutlo sa suspetsado,

Nakumpiska gikan sa dinakpan ang 180 gramos nga gidudahang shabu nga adunay gibana-banang kantidad nga P1,224,000.

Sa pikas bahin, tulo ka mga lalaki ang nasikop sa sagunson nga operasyon sa kapulisan sa Dakbayan sa Talisay niadtong Sabado sa gabii diha sa Sitio Hawod, Barangay Bulacao nga niresulta sa pagkasikop kang Elicio Tisoy, 44, nga nakuhaan og 15.2 gramos nga gidudahang shabu.

Sunod nga nadakpan mao si Noel Sereño, 37 , ug si Albert Mataw, 38, diha sa Sitio Hanas, Barangay Tabunok nga nakuhaan og 5.35 gramos nga gidudahang shabu.

Ang mga dinakpan gibalhug sa bilangguan nga gikatakdang pasakaan og kaso. – Gabriel Bonjoc/IBM (BANATNEWS)