Mayor sa Tuburan positibo sa COVID-19
CEBU, Philippines — Ika-upat nga mayor sa tibook isla sa Sugbo si Tuburan Mayor Danilo “Danny” Diamante nga natakdan sa novel coronavirus disease (COVID-19) human ang lungsod mi-post sa ilang Facebook page sa pamahayag sa mayor bahin niini.
“Bisan paman sa atong hugot nga pagpatuman sa quarantine protocols ug guidelines ubanan pa sa atong pag – amping ug pag – ampo nga dili kita masudlan ug mahilayo kita sa hulga sa sakit nga COVID – 19, akong dakong kasubo nga ipadangat kaninyo nga ako si Patient 10 nga natakdan sa maong sakit,” matud ni Diamante.
Wala hinoon gisaysay kun diin gikan ang mayor sa wala pa maglain ang iyang gipamati.
Sumala sa Mayor Agosto 11 nagsugod siya pag-isolate sa iyang kaugalingon human sa iyang gipamati sa lawas. Pagkasunod adlaw niana, Agosto 12, nipaubos siya og swab test ug Agosto 14 sa hapon nadawat ang resulta nga siya positibo sa COVID-19.
Gipa-disinfect dayon sa mayor ang tibook munisipyo niadtong Biyernes ug temporaryong isuspenso ang operasyon sa Mayor’s Office hangtod nga ipahibalo kun kanus-a kini balik magbukas.
Gisugdan na usab ang contact tracing ug isolation ang tanang na direct contact onahimamat sa mayor.
“Kini samtang ako gipaubos sa quarantine ug treatment pinasubay sa mando sa akong doktor. Akong ipasalig nga kining panghitabo kasamtangan lamang ug ato ning malampasan,” matud ni Diamante.
Unang natakdan si Lapu-Lapu City Mayor Junard “Ahong” Chan, gisundan ni Daanbantayan Mayor Sun Shimura ug Barili Mayor Marlon Garcia. /IBM (BANATNEWS)
- Latest
