Illegal nga drugas way paghubas bisan pa sa kwarantina

CEBU, Philippines — Gitug-an ni Philippine Drug Enforcement Agency 7 Regional Director Levi Ortiz nga way paghubas ang supply sa drugas bisan pa sa gipatuman nga quarantine.

Suma pa ni Ortiz nga human gipaubos sa general community quarantine ang syudad dali usab nga nakabalik sa ilang negosyo ang mga drug pushers.

Gitataw niini nga magsilbi unta nga warning sa mga nalambigit sa illegal nga drugas ang kamatayon sa kanhi police nga wanted sa Central Visayas nga si Nilo Quirante kinsa nakalas atol sa operasyon sa kapolisan diha sa Minglanilla.

Samtang lima ang nadakpan sa gilusad nga buybust operation sa Cebu Provincial Police Office (CPPO) Provincial Intelligence Branch sa Sitio Sulima Barangay Cotcoton Lungsod sa Liloan.

Giila ang mga dinakpan nga sila Rene Orat,45 anyos; Ronald Tagalog,55 anyos; Vincent Melendres,43 anyos; Rogelio Aljandro, 43 anyos ug Arlein Ruiz Jr.,32 anyos nga pulos taga Liloan.

Suma pa ni PIB Chief Police Lieutenant Randy Korret nga gitudlo nga usa sa kuhaanan sa illegal nga drugas si Tagalog sa lungsod sa Liloan.

“Matagal na namin siyang target tapos nalaman nalang namin na nagpalipat-lipat pala siya tapos para hindi siya kaagad makilala nag palit siya ng pangalan sa mga maka transaction niya”matud pa ni Korret.

Si Tagalog giingong makapamaligya  og 200 gramos matag adlaw ug makabat ngadto sa kapin usa ka kilo matag semana.

Nakuha gikan sa ilang mga posisyon mao ang 6 gramos nga mobalor ngadto sa 40 mil.

Samtang laing tulo ang nasikop sa gihimong operasyon sa Pardo Police Station niadtong Biyernes sa gabii sa Sitio Laguna Barangay Bulacao Dakbayan sa Sugbo.

Ang mga dinakpan nailhan nga sila si Arsenio Martinez, 35 anyos; Rico Batanciela,20 anyos; ug Danilo Lantape,36 anyos nga taga Barangay Bulacao Dakbayan sa Sugbo.

Nakuha gikan kanila mao ang 25.3 gramos kun mobalor ngadto sa dul-an 200 mil. Sheriza Mae Uy/ /MEL (BANATNEWS)