CEBU, Philippines — Mokabat ngadto sa P6.8 milyones nga balor sa gidudahang shabu ang nasakmit sa mga sakop sa Cebu City Police Office (CPPO) sa gipahigayong buy bust operation sa Sitio Eyha sa Barangay Guadalupe sa Dakbayan sa Sugbo.
Kini human nasayran sa kapolisan nga bisan paman dunay usa ka compound sa maong sitio padayong gipaubos sa granular lockdown tungod sa mga kaso sa novel coronavirus disease apan padayon ang negosyo sa ilegal nga drugas diha sa lugar.
Ang maong operation sa City Intelligence Branch (CIB) Chief Police Major Randy Caballes nga niresulta sa pagkasikop kanila ni Michael Cavan, 42, ug Felix Nisnisan, 34, pulos taga Barangay Guadalupe.
Matud ni CCPO Director Police Colonel Josefino Ligan, kapin usa ka bulan nga gipaubos og surveillance ang duha human nga sila nakadawat og impormasyon kalabot sa pagpamaligya nila og ilegal nga drugas sa lugar.
.Dugang pa ni Ligan nga basi sa ilang monitoring kinilo nga shabu ang baligya sa duha nga parehong mga high value target sa kapolisan ug dili sila mobaligay kun ginagmay.
Matud pa suppliers og illegal nga drugas ang duha ug duna silay contact sa prisohan sa kaulohan.
Nakuha gikan sa duha ang usa ka bag nga adunay sulod nga pinaketeng mga shabu nga gibanabanang moabot og usa ka kilo ug mobalor ngadto sa P6.8 milyones.
Samtang nadakpan sab sa kapolisan sa Parian Police Station sa may F. Villa Street, Sitio Santo Nino, Barangay T. Padilla ning dakbayan si Junrey Rosello.
Ang grupo ni Police Major Armando Labora nihimo sa operasyon human nakadawat sila og report bahin sa pagpayuhot og ginadili nga drugas ni Rosello.
Nasakmit gikan sa suspek ang gidudahang shabu nga mobalor og P50 mil.
Sa pikas bahin, nadakpan sab sa kapolisan sa Presinto 5 sa Lapu-Lapu City ang upat ka mga gidudahang tigpayuhot og ilegal nga drugas diha sa Barangay Pusok ug Barangay Buaya.
Si Police Captain Airbert Jay Samson, hepe sa Presinto 5 miila sa mga nadakpan nga sila si Ain Angeles,30, Marlon Quilantang, 30, ug Eddie Boy Galvez, 33, nga nakuhaan og mga pinaketeng gidudahang shabu.
Nadakpan sab diha sa Barangay Buaya sa grupo sa Philippine Drug Enforcement Agency - 7 si Allan Ramirez alyas “Allan Kagid,” 43.
Matud pa ni Leila Albiar, tigpamaba sa PDEA-7 si Ramirez usa ka high value target (HVT) sa ilang listahan ug base sa ilang report kadaghanan sa mamalit niini mga menor de edad. —/IBM (BANAT NEWS)