CEBU, Philippines — Nalandig sa tambalanan ang usa ka 3-anyos nga batang lalaki human kini aksidenteng napusilan og airgun sa iyang 6-anyos nga maguwang diha sa Barangay New Bago, Asturias kagahapong adlawa.
Ang managsuon nagpuyo diha sa Sitio Lamak sa maong barangay apan giingong nibisita sa payag sa apohan.
Matud pa Police Staff Sergeant Bendie Nuñez, Desk Officer sa Asturias Police Station gikuha sa 6-anyos ang improvised airgun diha sa payag dayong dul-it niini sa ulo sa manghod.
Sumala pa ni Nuñez aksidente nakablitan sa bata ang gatilyo ug maayong pagkaigo sa ulo sa manghud sa bala niini nga jolen.
Dali nga gidala sa tambalanan sa Dakbayan sa Sugbo ang bata alang sa operasyon.
Si Nuñez, nitug-an base sa imbestigasyon sa ilang imbestigador nagtuo ang bata nga duwaan ang maong airgun ug walay bala hinungdan nga gition niya kini ngadto sa manghud.
Ang 65-anyos nga apohan sa duha maoy tag-iya sa improvised air gun maoy gidakop sa kapolisan ug gitanggong sa prisohan tungod sa pagtinil sa maong armas ug sa nahitabo sa apo niini.
Ang batang aksidenteng nakapusil sa manghod anaa karon sa ilang mga ginikanan. — /IBM (BANAT NEWS)