Paglibot sa imahen ni Señor Santo Niño gilauman nga ipadayon sa simbahan

CEBU, Philippines — Tinguha sa kadagkuan sa simbahan nga ipadayon ang paglibot sa imahen sa balaang bata Senyor Santo Niño uban ang Jubilee Cross, ang replica sa Magellan‚s Cross sa higayon nga matapos na ang pandemya sa COVID-19.

Kini suma pa ni Rev. Fr. Aladdin Luzon, OSA, director for safety, security, peace and order, sa Basilica Minore del Sto Niño De Cebu.

Sa nasayran nakahimo na paglibot sa pipila ka mga parokya sa Archdiocese of Cebu ang imahen sa balaan nga bata ug jubilee cross apan nahunong kini tungod sa covid-19 pandemic.

Sumala pa ni Luzon, nga himoon nila ang pag-adjust sa mga skedyul sa paglibot sa mga parokya ilabi na niadtong mga parokya nga una nang naka skedyul nga maoy ilang adtoan.

Gidugang ni Rev. Fr. Luzon nga sila nag-ampo nga sa dili madugay makasugod na sila pagbalik sa himoon nga pilgrimage subay sa kasaulogan sa ika-500 ka tuig nga kasumaran sa kristyanismo sa Pilipinas sunod tuig.

Mahinumduman niadtong Disyembre 1, 2019 gipahigayon ang countdown mass ug send-off sa Balaan nga Bata Snr. Sto Niño ug Jubilee Cross nga gitinguha nga molibot sa 500 ka mga parokya sa tibuok nasud. – Rowena D. Capistrano/MEL

OPAV nakahatag na og kapin sa 4 mil ka food packs sa mga frontliners

Mokabat sa kapin na sa 4,000 ka food packs ang naapod apod sa Office of Presidential Assistant for the Visayas (OPAV) ngadto sa mga medical frontliners diha sa Vicente Sotto Memorial Medical Center (VSMMC) sugod sa unang semana sa buwan sa Hulyo.

“We are providing our frontliners with the much-needed support, not just in terms of personal protective equipment (PPE), but also food as an expression of our gratitude to them,” suma pa ni  OPAV Secretary Michael Lloyd Dino sa iyang press statement.

Suma pa ni Dino nga ang sugbuanong negosyante nga si Eric Uy maoy usa sa mitabang sa paghatag og pagkaon alang sa medical frontliners diha sa VSMMC.

“We will continue to extend whatever assistance we can give to our medical workers who are selflessly helping our country fight the COVID-19 pandemic,” dugang ni Dino.

Gipasalamatan usab niya ang mga pribadong sector sa kanunay nga pagtabang dinhi sa Kabisay-an ilabi na dinhi sa Sugbo aron matubag ang mga panginahanglan pagpakigbatok sa COVID-19.

Lakip sa mga hinabang nga ilang nadawat mao ang mga PPE ingon man PCR machines nga gidonar ngadto sa mga ospital.

Ang Christina Lee Dino Foundation, maoy usa sa mihatag og donasyon nga mga PPE ug PCR machines ngadto sa nagkalain-laing publikong tambalanan dinhi sa Visayas. Apil sa tabang nga ilang gihatag mao ang libreng transportasyon alang sa mga frontliners pinaagi sa pagpakatap sa Malasakit buses. The Freeman/MEL