CEBU, Philippines — Gilauman sa kagamhanan sa Dakbayan sa Mandaue nga mahuman og dali ang kaugmaran sa North Bus Terminal isip bag-ong isolation facility sa siyudad.
Si Atty. Eddu Ibañez, executive secretary ni Mayor Jonas Cortes nagkanayon nga tinguha nga mahuman dayon ang maong kaugmaran tungod kay ang mga publikong tulunghaan nga gihimong isolation facility sa siyudad ang ibalik na ngadto sa Department of Education (DepEd) Mandaue City Division.
Matud ni Ibañez nga duha ka bag-ong isolation facility ang giugmad sa kagamhanan nga naglakip sa Norkis Park diha sa dalan Plaridel sa Barangay Looc nga gitagana alang sa mga mild nga pasyente sa coronavirus disease 2019.
Ang mga personnel sa City Disaster Risk Reduction and Management Office (CDRRMO) nga gipangulohan ni Felix Suico Jr. ang nagpadayon sa ilang disinfection ug decontamination diha sa mga publikong tulunghaan nga gihimong barangay isolation facility sa mga nataptan sa COVID-19.
Gikatakda nga sa dili pa ang klase sa Agosto 24, 2020 mabalik na sa siyudad ngadto sa DepEd ang nahisgutang mga tulunghaan. /BDB (BANATNEWS)