Kalunasan nangayo og tabang sa relocation sa 300 ka panimalay
CEBU, Philippines — Ang Barangay Kalunasan sa Dakbayan sa Sugbo nangayo og tabang sa kagamhanan sa siyudad aron ma-relocate ang 300 ka panimalay nga nahimutang diha sa tampi sa sapa nga kuyaw kaayo sa dahili sa yuta.
Ang kapitan sa Kalunasan Nunilon Monares Jr. nitug-an nga ang landslide niadtong Hulyo 29, 2020 nga niguba og duha ka balay dili bag-o sa lugar tungod kay kanunay kining masinati diha sa daplin sa sapa sulod sa usa ka dekada na ang nakalabay.
Si Monares nitumbok nga ang 300 ka panimalay nakalapas kini sa 3-meter easement policy sa tampi sa sapa.
Si Monares nanghinaot nga ang siyudad makakita og mas luwas nga lugar nga mahimong kabalhinan sa mga molupyo aron dili sila mamiligro sa pagdahili sa yuta. Sayo pa, duha ka panimalay ang naapektohan sa mini landslide nga niigo sa maong barangay ug swerte nga walay naangol o nakalas sa maong pagdahili sa yuta. – Rowena D. Capistrano/BDB
Gullas nipasalig og suporta sa DepEd
Si Mayor Gerald Anthony “Samsam” Gullas Jr. nipasalig sa iyang suporta ngadto sa Department of Education (DepEd) Talisay City Division.
Ang DepEd mopahigayon kini og bag-ong pamaagi sa pagtudlo ubos sa new normal tungod sa pandemiya nga nasinati karon.
Si Gullas nakigtagbo sa kadagkoan sa mga magtutudlo diin gihisgutan ang ilang mga laraw sa bag-ong pamaagi sa pagtudlo.
“I’ll be very honest and transparent with all of you. Kong kaya sa budget, I would have wanted tablets to all students. But with certain constraints it would be very difficult. Let me say it here para you’ll know that we have thought of it, but moving forward these were the perceived difficulties”, tipik sa post ni Gullas sa iyang facebook page.
Ang kagamhanan sa siyudad gikatakdang mohatag og 44 ka bag-ong laptop sa mga school head, printer ug unlimited ink sulod sa usa ka semester, tanang eskwelahan mahatagan og photo copier ug risograph machine ug mga logistical support.
Nanghinaot usab si Gullas nga magtinabangay ang tanan aron mahinay-hinay nga masabtan ang bag-ong kausaban sa pagtudlo sa mga kabataan. /BDB (BANATNEWS)
- Latest
