CEBU, Philippines — Dili lang mga polis nga nagbantay sa kadalanan ang natakboyan sa novel coronavirus disease, ang Central Command mipahibalo nga 144 nila ka mga sundalo ang nagpositibo sa maong sakit.
Gipahibalo sa tigpamaba sa Centcom nga si Army Major Eduardo Prescioso, sagad sa mga nataptan mao kadtong gipatabang pagbantay sa mga komunidad aron ipasunod ang health protocols.
Matud pa niya, sa 144 ka mga sundalong positibo sa COVID-19, ang 87 na niini ang naka recover na ug 57 pa sab ang anaa sa mga isolation facility aron hingpit nga magpaalim.
Sa pikas bahin, ang CentCom misuporta sab sa programa sa Department of Health sa pagkolekta og mga blood plasma gikan sa mga nangaayo na sa maong sakit aron magamit sa pasyenteng padayong nakigbisog sa sakit diha sa mga tambalanan sa kabisay-an.
Dunay 26 ka mga sakop sa 53rd Engineering Brigade sa Camp Lapu-Lapu nga nangaayo na gikan sa COVID-19 ang nidonar sa ilang blood plasma sa DOH.
Matud ni Colonel Gerardo Catindoy kabahin kini sa ilang panerbisyo sa publiko ilabi na karong adunay pandemiya.
Niadtong nakalabay nga adlaw, gipahibalo ni PRO-7 director Albert Ferro nga 139 ka mga police recruits niini ang bag-ohay lang nadiskubrehang positibo sa maong sakit. Kini bisan pa og wala sila ma-deploy pagbantay sa kadalanan.
Samtang gatosan na sab ka mga sakop niya ang nangatakboyan sa maog sakit, apan kadaghanan nangaayo na ug nakabalik na sa serbisyo ang uban, samtang aduna pay nagpabilin sa isolation facility niini. /IBM (BANATNEWS)