SAF magpabilin bisan GCQ na
CEBU, Philippines — Magpabilin gihapon ang mga sakop sa Special Action Force ug ubang augmented personnel gikan sa laing rehiyon bisan mapaubos na sa general community quarantine ang Dakbayan sa Sugbo ugmang adlawa.
Matud ni Police Regional Office 7 Director Albert Ferro nga nihangyo siya sa kadagkuan sa kapolisan nga magpabilin ang tropa aron mamintinar ang pagminus sa kaso sa coronavirus disease sa dakbayan.
Iyang gipasabot nga kung kuhaon na ang pwersa sa kadalanan, moluag na ang pagpatuman sa community quarantine ug daku ang posibilidad nga mosaka na usab ang kaso sa COVID-19.
Bisan mapaubos na sa GCQ, matud ni Ferro nga istrikto gihapon ang pagbantay sa manggawas sa tagsa-tagsa ka panimalay tungod ky ang virus anaa gihapon sa palibot.
Sumala pa niya nga ang Regional Inter-Agency Task Force (IATF) nirekomendar sa Malacan~ang nga luagan na ang community quarantine sa dakbayan gikan sa modified enhanced community quarantine aron hinay-hinay na nga makabangon ang ekonomiya.
Apan dili angayan mokompiyansa ang publiko tungod kay naa pa gihapon ang virus ug magpadayon sa pagtuman sa health protocols sama sa pagsul-ob kanunay sa facemask ug ang social distancing.
Gipalambo pa sa kapolisan ang ilang contact tracing diin dunay gihimo nga clustering paingon sa kabarangayan aron sa lapad nga pagpangita niadtong posibleng nakahimamat sa mga nagpositibo sa COVID-19. /GMR (BANATNEWS)
- Latest
