LSI niambak sa kural patay; Talisay mohatag og travel authority

CEBU, Philippines — Patay  ang usa  ka locally stranded individual (LSI) human naugbok ang ulo niini dihang nilayat kini sa kural sa balay nga iyang gipuy-an diha sa Barangay  Yati, Lungsod sa Liloan kagahapon sa kadlawon.

Si Police Staff  Master  Sergeant  Jayson Gayo sa Liloan Police  Station niila sa namatay nga mao si Roger  Resonda, 43 -anyos, minyo, lumad nga taga Misamis Occidental ug temporaryong nagpuyo sa panimalay  sa iyang paryente  diha sa nahisgtuang lugar.

Matud ni Gayo nga sa pakisusi nga ilang gihimo nasayran nga si Resonda kinsa naghambin og stage 4 cancer nahidangat  sa Sugbo sayo niadtong buwan sa Marso niining tuiga aron unta magpatampal.

Apan naabtan kini  sa gipatuman  nga lockdown  hinungdan nga wala makapauli ngadto sa Misamis Occidental ug  nipuyo una kini  sa iyang paryente diha sa Yati.

Si Gayo nagkanayon nga nakakuha sila og footage gikan sa Close Circuit Television (CCTV) camera sa pipila ka mga panimalay sa lugar ug ilang nakita nga si Resonda nituyo sa pagsaka sa kural ug nilayat kini hinungdan  nga naugbok ang ulo diha sa yuta ug gituohang hinungdan sa iyang kamatayon.

Sa laing bahin, mahimo na unya nga makahatag og travel authority ang Dakbayan sa Talisay alang sa mga locally stranded individual (LSI).

Kini ang gibutyag ni Mayor Gerald Anthony “Samsam” Gullas Jr.

Una niini, gisuspenso sa Department of Interior and Local Government (DILG) ang paghatag og travel authority sa Philippine National Police (PNP) niadtong niaging buwan.

Apan bag-o lang si Gullas nitawag sa direktor sa DILG-7 Leocadio Trovela aron makabalik na sa pagpanghatag og travel authority ang PNP.

Si Gullas nihangop kini sa pagsanong ni Trovela sa iyang hangyo aron makauli ang mga LSI sa Dakbayan sa Talisay ngadto sa ilang mga lugar.

Hinuon gihuwat pa nga moluwat og memorandum si Trovela nga maoy basehan nga makahatag na usab og travel authority ang kapolisan. Gabriel C. Bonjoc/BDB (BANATNEWS)