PRO-7 mopatuman og granular lockdown

CEBU, Philippines — Mopatuman og granular lockdown ang Police Regional Office (PRO)-7 sa Dakbayan sa Sugbo. Kini human nga gipaubos ngadto sa modified enhanced community quarantine (MECQ) sulod sa 15 ka adlaw human sa usa ka buwan nga pagbalik ngadto sa enhanced community quarantine (ECQ) ang Dakbayan sa Sugbo.

Ang direktor sa PRO-7 Police Brigadier General Albert Ferro nagkanayon nga ang granular lockdown ipatuman ngadto lang sa mga dapit o sa barangay o sitio nga padayon gihapon ang pagsaka sa kaso sa covid-19.

Matud ni Ferro nga ang pagpaubos ngadto sa MECQ sa Dakbayan sa Sugbo wala kayo kini kalahian sa ECQ apan gitan-aw niya kini nga maayo nga lakang nga wala dayon gikalit ang pagpaubos sa general community quarantine (GCQ) ang dakbayan.

Base sa datos sa Cebu City Health Department giingong 70 porsyento ka barangay sa Dakbayan sa Sugbo ang adunay mga natala nga kaso sa covid-19.

Sa laing bahin, ang Inter-Agency Task Force nagtinguha sa pagpalig-on sa ilang koordinasyon uban ang mga kabarangayan sa Dakbayan sa Sugbo aron mas maimplementar pa nila ang guidelines sa quarantine.

Ang IATF makigtagbo sa Association of Barangay Council (ABC) aron sa pagtuki kabahin sa paghan-ay sa datos gikan sa barangay padulong ngadto sa Department of Health pinaagi sa Emergency Operation Centers.

Ang maong kalamboan nigawas samtang ang EOC padayong nipalambo sa iyang data collection efficiency sa barangay level aron ang siyudad makapanday og mas responsive measures batok sa covid-19. Rowena D. Capistrano/BDB (BANATNEWS)