CEBU, Philippines — Gisuspenso sa Lungsod sa Daanbantayan ang bayranan sa paglukat og medical certificate ngadto sa Municipal Health Office sa lungsod.
Base sa Facebook page sa lungsod gipahibalo sa Local Government Unit (LGU) ang temporaryong pagtangtang sa P105 nga bayranan sa pagkuha og medical certificate tungod sa padayon nga nasinati karon nga pandemiya sa covid-19.
“Nagdesisyon ang lokal nga pangagamhanan pinaagi ni Mayor Sun J. Shimura nga walay bayad ang medical certificate nga lukaton gikan sa Municipal Health Office isip requirement sa pag-issue og travel pass alang sa mobiyahe padulong Cebu City ug uban pang mga LGUs”, tipik sa post diha sa Facebook page sa lungsod.
Si Shimura nakigsabot pa ngadto sa mga konsehal aron nga mopasar og ordinansa aron temporaryong isuspenso ang tax code ilabi na ang bayranan sa medical certificate. /BDB (BANATNEWS)