CEBU, Philippines — Nasikop ang duha ka tawo sa mga tinugyanan sa Philippine Drug Enforcement Agency 7 ug Cebu Provincial Police Office Police Drug Enforcement Unit.
Kini atol sa buy-bust operation sulod sa sam-ang sa Barangay Carreta, Dakbayan sa Sugbo alas 9 pasado niadtong Huwebes sa gabii.
Ang nasikop mao ang magsuon nga sila si Dante Fernandez alyas Dandan, 44, subject sa buy-bust ug caretaker sa mga lubong sa sementeryo, ug Danilo Fernandez Jr., 40, kargador, ug puros minyo nga nagpuyo sa maong lugar.
Nasakmit gikan sa mga dinakpan ang mga pinutos sa ginadili nga drugas nga mobalor og P748 mil, buy-bust money, kapin sa P2,000 nga gituohang halin ug sudlanan.
Matud pa sa tigpamaba sa PDEA-7, Leia Albiar-Alcantara, nga nagpahigayon sila og case build-up batok sa subject pipila ka buwan apan nahunong tungod sa COVID-19, ug nibalik ra kini duha ka semana ang nilabay.
Sumala pa ni Alcantara nga dul-an sa tunga sa kilo ang mabaligya sa subject matag semana.
Gitug-an ni Alcantara nga ang pangalan sa mga dinakpan nigawas sa dihang adunay mga drug personalities ang nasikop sa mga nilabay nga operasyon.
Ang mga dinakpan nagtingkagol na karon sa prisohan samtang nagpaabot nga pasakaan og tukmang kaso. /GMR (BANATNEWS)