CEBU, Philippines — Nakagawas sa tambalanan si Daanbantayan Mayor Sun Shimura gikan sa iyang pagka-positibo sa coronavirus disease 2019. Hunyo 21 gipahibawo sa Daanbantayan Facebook page nga si Shimura nataptan sa COVID-19.
Siya ang ikaduhang mayor sa tibuok isla sa Sugbo nga nataptan sa virus.
Sa post kagahapon sa Municipality of Daanbantayan Facebook page, si Shimura giingong 70 porsyento na nga nakarekober sa virus. Anaa siya karon nag-isolate sa ilang balay sa Dakbayan sa Mandaue.
“Ang iyang kapikas, Board Member Kerrie Keane Shimura ug ang ilang 3 ka anak gipailawom na sa swab test. Salamat sa Ginoo og negative sa COVID-19 ang tulo ka bata. Samtang si Board Kerrie, asymptomatic o wala kini magpakita og simtomas. Silang duha ni Mayor Sun naka-isolate karon sa ilang panimalay,” matud sa Facebook post kagahapon.
Si Mayor Shimura wala na kini magpakita pa og sintomas. Niadtong Hunyo 27, 2020 gipahibalo sa lungsod nga ang tulo ka close contacts ni Shimura nagpositibo usab sa COVID-19. Tungod sa pagkapositibo ni Shimura gisirad-an ang Mayor’s Office sa Daanbantayan.
“Samtang ang iyang mga close in staff are all safe and sound, ug nagpaabot nga mahuman ang ilang quarantine period aron makabalik na usab sa trabaho,” sumala sa maong Facebook post. /GMR (BANATNEWS)