Mga hilit sa Mandaue gisulod sa mga traffic enforcers

CEBU, Philippines — Gihingusgan karon sa buhatan sa Traffic Enforcement Agency of Mandaue (TEAM) ang ilang pagbantay sa mga hilit nga mga dalan sa kabarangayan.

Kini pinaagi sa pagdestino sa ilang mga traffic enforcers alang sa pagsikop sa makalapas sa lagda nga gipatuman sa kadalanan ug health protocols sa paglikay sa pagtakboy sa coronavirus disease 2019.

Sa gihimo nga operasyon sa mga TEAM personnel maoy sagad sa ilang mga nadakpan ang mga motorsiklo nga nilapas sa “no backride policy” nga naglakip na sa mga habal-habal tungod sa gipaangkas nga pasahero.

Gipasabot sa mga traffic enforcers sa TEAM nga nagpahigayon sa ilang operasyon nga ang habal-habal ang gidili pa nga mohimo sa ilang operasyon sanglit gidili pa man gihapon ang pagpaangkas og pasahero ubos sa general community quarantine.

Dugang kalapasan nga ilang nahimo sa mga nagluwan og motorsiklo nga mga nadakpan mao ang pagmaneho nga walay gidala nga lisensiya, wala magsul-ob og helmets o expire na ang rehistro.

Sa nasayran pinaagi sa post sa Facebook sa Mandaue City Public Information Office (PIO) kagahapon sa buntag nga hangtud niining panahona, ang mga personnel sa City Disaster Risk Reduction and Management Office (CDRRMO) nga gipangulohan ni Felix Suico Jr. ang nagpadayon sa ilang contact tracing ug pag-disinfect sa mga dapit nga maoy gipuy-an sa mga bag-ong kaso sa COVID-19.

Giila ang mga dapit nga gihimo ang pag-disinfect mao ang Sector 4 sa Barangay Pagsabungan; Zone Camansi, Paknaan; H. Abellana Ext. Pagsabungan; Purok Star Apple sa Barangay Umapad; Pine St. Almiya Subdivision sa Canduman; AS Fortuna St. sa Banilad ug Cabancalan sa Dakbayan sa Mandaue.

Dugang pa nga gi-disinfect nga mga dapit mao ang Admacor, Maguikay; Basak sa Dakbayan sa Mandaue, Back Matimco, Subangdaku; Mantawi St., Subangdaku; Sto. Niño, Jagobiao; Sitio Kalubihan, Labogon; Paradise, Tabok; Waling-waling, Opao; Lower Gothong, Subangdaku; Grancena, Opao; Guizo; Zone 2 Fleurdeliz, Canduman; Holy Spirit Pagsabungan; E. Cortes St. Pilit, Cabancalan; Palmas Verdes, Tabok; Reclamation Area sa Dakbayan Mandaue ug Sitio San Roque sa Barangay Pagsabungan. /GMR (BANATNEWS)