Abusado nga polis isumbong sa PRO-7
CEBU, Philippines — Giawhag ni Police Regional Office 7 regional director, Brigadier General Albert Ignatius Ferro, ang katawhan nga mo-report kanila kung dunay polis nga abusado.
Kini human nigawas ang taho nga dunay mga polis nga niabuso sa ilang gahum diin sumala pa ni Ferro nga ila kining imbestigaron ug mopatuman og disciplinary measures. Matud ni Ferro nga sa wala pa nagsugod ang pagpatrolya ang kapolisan gipahibawo sila sa Inter-Agency Task Force (IATF) guidelines ug ang pag-respeto sa tawhanong katungod.
“Actually ang atong kapolisan naay human rights office so we are doing that, we are guided by police operational procedure, we are guided by the basic criminal procedure so kanang mga excesses isumbong ninyo sa akoa, we will act on it,” matud ni Ferro.
Gihimug-atan ni Ferro nga dili nila i-tolerate ang bisan unsa nga klase sa pagpangabuso sa usa ka police officer.
“During this time we cannot fail the people, we cannot fail the Sugbuanons that your protector, will be your prosecutor or abuser,” dugang ni Ferro.
Samtang gihulagway ni Ferro nga daku gyud og tabang ang pag-abot sa mga Special Action Force (SAF) troopers sa Siyudad sa Sugbo ilabi na nga daghan sa kapolisan sa siyudad ang naigo sa coronavirus disease (COVID)-19. Gipasalig niini nga buhaton ang tanan sa kapolisan aron maprotektahan dili lang ang mga Sugbuanon apan lakip na ang tibuok Central Visayas. /GMR (BANATNEWS)
- Latest
