CEBU, Philippines — Gipahimutang sa isolation room ang 18 ka polis sa Consolacion Police Station human sa contact tracing sa close contact sa usa ka polis nga gidestino isip sakop sa augmentation force nga nagpositibo sa coronavirus disease 2019.
Nunot sa pagpahimutang sa isolation room sa maong mga polis maoy gihimo ang pagsirado sa tibuok buhatan sa kapolisan ug gipahigayon ang pag-disinfect sa sulod ug gawas sa maong police station.
Si Police Colonel Roderick Mariano, direktor sa Cebu Police Provincial Office (CPPO), maoy niluwat sa kamanduan sa pagsirado sa Consolacion Police Station ug pag-isolate sa mga polis sa paglikay nga mokatap ang maong sakit.
“I advised immediately na wala munang papasok habang hinihintay na ma-swab,” matud ni Mariano.
Dugang niyang gimando ang pagpahigayon og contact tracing sa mga tawo nga nakapaduol sa maong mga polis samtang gipaabot pa ang resulta sa ilang swab test. Matud ni Mariano nga ang polis nga sakop sa augmentation force nga positibo sa Covid-19 gidestino sa Consolacion Police Station niadtong Hunyo 16, 2020.
Siya gipaubos sa swab test niadtong Hulyo 24 ug Hunyo 26 na nga nigawas ang resulta niini.
Gitataw hinoon ni Mariano nga ang 18 ka gi-isolate nga mga polis nga gikatakdang ipaubos pa sa swab testing ang anaa sa maayong kondisyon sa ilang panglawas ug walay mga timailhan sa virus.
Nunot sa pag-isolate sa 18 ka polis sa Consolacion Police Station maoy gipadala ang napulo ka polis sa CPPO isip augmentation force. /GMR (BANATNEWS)