Mayor Chan negatibo na sa COVID-19

CEBU, Philippines — Malipayong gipahibawo ni Lapu-Lapu City Mayor Junard “Ahong” Chan atol sa kapistahan ni San Juan Bautista kagahapon nga negatibo na siya sa katapusang resulta sa iyang swab test.

Napupos kagahapon ang 14 ka adlaw niya nga isolation gikan sa pag-swab test niya niadtong Hunyo 10 diin siya nagpositibo.

Gitug-an sa mayor nga niadtong Hunyo 12 atol sa flag raising ceremony sa pagsaulog sa Independence Day nipahibalo siya sa iyang kahimtang ug natandog siya sa mensahe ug suporta sa katawhan nga gipadangat kaniya.

Matud ni Chan nga imbis maluya siya, nadasig hinoon siya nga magpakaayo og dali aron makabalik siya sa iyang pagpangalagad.

Gibutyag ni Chan ang makabungog nga suporta ug pagdasig inubanan sa hugot kaayo nga pag-ampo nga maoy naghatud kaniya sa dinalian nga kaayuhan.

Ang mayor nitug-an nga susama sa binunyagan kanhi ni San Juan Bautista, nakabaton usab siya karon og ikaduha nga kinabuhi human naayo sa Covid-19 diin gilantaw niya nga usa ka milagro ug utang niya sa Langitnon nga amahan, Mahal nga Birhen sa Regla ug Balaan nga Bata, Señor Santo Niño ug sa hiniusa nga pag-ampo sa tanan.

Ang mayor nagpanikad na nga mobalik sa trabaho ug aron mapadayon ang iyang pagpakigbatok sa Covid-19.