CEBU, Philippines — Giimbestigar karon sa kapolisan sa Cebu Provincial Police Office (CPPO) ang giingong pagdagit sa usa ka farmers group community organizer sa Lungdod sa Bantayan niadtong Sabado sa gabii.
Matud ni Police Colonel Roderick Mariano, direktor sa CPPO, nga ilang nadawat ang maong report sa pagdagit alas 9:40 sa gabii gikan sa barangay kapitan sa Kampinganon sa maong lungsod.
“Pumunta siya mismo sa estasyon at ini-report ang sinasabing alleged abduction incident,” sigun ni Mariano.
Sa ilang inisyal nga imbestigasyon, giingong ang biktima nga si Elena Tijamo gidagit sa usa ka grupo sa unom ka wala mailhing lalaki sa iyang balay sumala sa mga pamahayag sa iyang pamilya.
Giingon usab ni Mariano nga sila nangita og mga testigo nga mahimong makatabang kanila sa pagtudlo sa mga posible nga mga lalaki nga nidagit sa biktima.
Ang kapolisan gimanduan sab nga alerto sa pagbantay sa maong lugar.
Gawas niini, matud ni Mariano nga ang mga coastal barangays sa isla gipahibawo ug gimanduan nga magpabiling alerto.
Sumala pa ni Mariano nga ila sab karon gisusi ang background sa biktima.
Wala usab nila gisalikway ang posibilidad nga ang pagdagit ni Tijamo mahimong konektado sa iyang trabaho isip usa ka organizer sa usa ka grupo sa komunidad sa mga mag-uuma.
Dugang ni Mariano nga nanghipos sila karon sa mga pahayag sa pamilya ni Tijamo kalabot sa hitabo. /GMR (BANATNEWS)