CEBU, Philippines — Higpit nga gipahimangnuan sa buhatan sa Traffic Enforcement Agency of Mandaue (TEAM) ang dunay mga sakyanan nga likayan ang pag-parking sa gigahin nga bike lane.
Kini human gituki sa maong buhatan ingon man sa City Planning Office ug ni Konsehal Jimmy Lumapas nga maoy chairman sa committee on transportation sa konseho sa siyudad ang mga dalan nga butangan og bike lane. Dakpon gyud ang mga sakyanan nga makaali sa bike lane sa mga traffic enforcers.
Ang pagbutang og bike lane sa gipili nga mga dalan sa dakbayan gitumong sa paghatag og kasegurohan sa magbiseklita nunot usab sa kalisud sa pagsakay karong panahona tungod sa nagpadayon nga hulga sa coronavirus disease 2019.
Talisay bike lane
Samtang nagplano sab si Talisay City Mayor Gerald Anthony “Samsam” Gullas Jr. nga magbutang og bike lanes sa karsada aron sa pag-atubang sa tanan niining “new normal”.
Si Gullas nakigtagbo ni Jonathan Tumulak, traffic czar sa siyudad, ug ni Engr. Christine Homez, pangulo sa City Planning Office aron sa pagpatuman sa laraw.
Sila nagkasabot nga magbutang og upat ka bike lanes sa karsada gikan sa Pooc paingon sa Sombrea, Lawaan; Poblacion paingon sa Linao (agi sa likod sa City Hall); Linao paingon sa Bulacao ug Tabunok paingon sa bukirang barangay.
Plano sab ni Gullas nga maghimo og bike lane gikan sa Deca Homes sa Barangay Dumlog paingon sa mall sa Barangay Tabunok.
Lakip na sab unya ang bike lane sa South Road Properties (SRP).
Apan siya niingon nga iya una kining gipugngan samtang mangita pa og laing opinyon sa ubang ahensya sa gobiyerno ug sa nagkalain-laing sektor. Gabriel C. Bonjoc/GMR (BANATNEWS)