Mga Seniors naghugop sa Cebu City Hall
CEBU, Philippines — Nagdasok ang mga senior citizens atubangan sa Cebu City Hall nga gustong mokuha sa ilang financial assistance bisan sa uwan kagahapon.
Gawas nga gidili ubos sa general community quarantine nga makagawas ang mga senior citizens tungod sa hulga sa coronavirus, giingong wala pa gyud natuman ang social distancing.
“Dili maayo kay sayo kaayo mi nigikan sa amoa, 7, Minglanilla kay among balay didto sa Sambag 2 naa may problema,” matud sa 62-anyos nga si Carmelito Tajonera.
Nunot sa maong sitwasyon, si Jeffrey Ocampo, executive director sa Office of the Senior Citizens Affairs, niklaro nga gisunod gyud nila ang stay at home order alang sa mga senior citizens.
Nagpadayon ang ilang house-to-house distribution subay sa kamanduan ni Mayor Edgardo Labella.
Asoy niini nga sagad sa mga nangadto sa City Hall wala nag-istar sa Siyudad sa Sugbo apan mao kini ang naa sa ubang mga lugar ug wala sa ilang pinuy-anan dihang gihatud ang financial assistance.
Hinoon gihatagan gyud ang mga senior citizens apan didto sa Cebu Coliseum human sila gihakot sa mga bus.
Gitataw sab ni Ocampo nga duna sila’y gipagawas nga letter of authority to receive nga ma-download sa Facebook page sa OSCA aron dili na mogawas ang mga senior citizens ug kadtong awtorisado nalang ang mokuha. Si City Administrator, Atty. Floro Casas Jr, nitataw nga ang ilang pagbalhin sa mga senior citizens alang usab sa ilang kaluwasan gu seguridad. Rowena D. Capistrano/GMR (BANATNEWS)
- Latest
