Rehistro sa bisekleta sa Cebu City gisuspenso

CEBU, Philippines — Si Mayor Edgardo Labella sa Dakbayan sa Sugbo niluwat sa Executive Order No. 80 series of 2020 alang sa temporaryong pagsuspenso sa pagrehistro sa mga bisekleta nga magdagan sa kadalanan sa Siyudad sa Sugbo.

Aron pagsuporta sa alternative, sustainable means sa transportasyon atol sa general community quarantine ilabi na karon nga lisod pa gihapon ang public transportation si Labella temporaryong nisuspenso sa bicycle license ug registration.

Sayo pa, daghan ang nireklamo dihang gipahibawo nga irehistro ang bisekleta diin hangyo sa publiko nga butangan og bike lane ang siyudad una moparehistro sa mga bisekleta.

Sa laing bahin, gihangop sa mga cyclist ang gihimo sa kagamhanan sa Dakbayan sa Mandaue sa pagbutang og bicycle lane.

Matud sa mga cyclist nga ang maong lakang sa siyudad nakapahupay sa ilang kabalaka nga sila malikay sa aksidente.

Si Atty. John Edu Ibañez, executive secretary ni Mayor Jonas Cortes nipahimangno sa mga magsakay og bisekleta nga likayan gyud nila ang paglapas sa mga lagda nga gipatuman alang kanila.

Naglakip sa mga lagda mao ang pagsul-ob og helmet, pagkompleto sa mga accessories  nga naglakip sa reflector ug suga sa luyo og atubangan aron makita kini sa panahon sa gabii.

Ang mga motorist gipahimangnoan usab nga dili mosubay diha sa bike lane paglikay sa disgrasya.

Matud ni Ibañez nga unang mga dagkong dalan nga gibutangan og badlis isip phase one alang sa bike lane mao ang dalan AC Cortes ug A.S. Fortuna.

Ug lakip usab nga butangan og bike lane mao ang dalan P. Burgos. Romeo T. Limpangog/BDB (BANATNEWS)