CEBU, Philippines — Patay ang usa ka amahan ug angol ang laing anak niini human gidunggab sa iyang anak nga hubog sa may Sitio Acacia, Barangay Estaca, Lungsod sa Compostela, alas 11 pasado niadtong Domingo sa gabii.
Ang namatay naila nga si Alfredo Amores Sr., 70-anyos, minyo, samtang ang naangol mao si Rolando Amores, 46-anyos, anak sa biktima.
Ang suspek mao si Alfredo Amores Jr., 37-anyos, ulitawo.
Matud ni Police Corporal Roland Alo, desk officer sa Compostela Police Station, nga nakadawat ang ilang buhatan og tawag sa usa ka concern citizen may kalabutan sa insidente hinungdan nga dali kini nga girespondehan.
Atol sa pagresponde sa kapolisan, gi-turnover sa ila ang suspek nga si Alfredo Jr., kinsa maoy nidunggab sa iyang amahan ug nikulata sa iyang maguwang nga niuwang unta sa away.
Sumala pa ni Alo nga dali unta nga gidala sa tambalanan ang amahan apan gideklarar kining patay sa doktor gumikan sa mga samad dinunggaban nga naangkon niini sa lainlaing parte sa lawas samtang ang laing anak niini nagpabilin sa tambalanan tungod sa mga naangkon niining bun-og.
Base sa imbestigasyon giingong nasuko si Alfredo Jr. human gibadlong sa iyang amahan nga dili maghubog-hubog..
Giingong nasuko ang suspek ngadto sa amahan ug nagkalalis nga niresulta sa pagpanunggab.
Si Rolando nga nakakita sa hitabo ang dali nga nibadlong sa maong pagdunggab apan lakip na hinoon kini sa gidunggab sa igsuon.
Ang kapolisan nag-andam na sa tukmang kaso nga ipasaka batok sa anak nga nipatay sa iyang amahan ug niangol sa iyang igsuon ug kasamtangan karon nga nagtingkagol sa prisohan sa Compostela Police Station. Romeo T. Limpangog/GMR (BANATNEWS)