Suspek pagpatay sa dalagita naghikog?

CEBU, Philippines — Suspek sa paglugos ug pagpatay sa 16 anyos nga dalagita nakit-ang nagbitay na sa kasilyas sa selda niini sa Lapu-Lapu City Jail niadtong Domingo sa buntag.

Ang namatay mao ang 43-anyos nga si Renato Llenes, suspetsado sa pagpatay  kang Christine Lee Silawan diha sa usa ka bakanteng luna sa Barangay Bankal niadtong Marso 10 sa miaging tuig.

Gitug-an ni BJMP Lapu-lapu City Jail Warden Jail Supt. Jessie Calumpang nga nahinabi sa Banat News nga duna silay himuong imbestigasyon bahin sa kamatayon ni Llenes human nga giingong aduna kini nadawat nga pagpanghulga sa kinabuhi gikan sa paryente ni Silawan nga piniriso sab diha sa maong pasilidad.

Si Llenes nakit-ang wa nay kinabuhi ug nagbitay kini gikan sa linubid nga sinina nga gihikot diha sa liog niini.

Matud pang Calumpang lahi ra kaayo sa kasagarang mga kaso sa paghikog nga ilang nakita ang nahitabo kang Llenes maong nagduda sila ug mirekomendar nga ipa-awtopsiya ang lawas niini. Kung mahinumduman si Llenes maoy gitumbok nga naglaplap sa nawong sa ug nagpatay sa dalagitang si Silawan nga iyang giilad pinaagi sa Facebook diin siya nagpailang batan-on.

Samtang gimandoan ni Police Regional Office 7 Directir Police Brigadier General Albert Ferro ang LLCPO nga mopahigayon og lawom nga imbestigasyon sa posibilidad nga adunay foul play sa kamatayon sa maong inmate. Sheriza Mae Uy/IBM (BANATNEWS)