CEBU, Philippines — Ang classrooms sa mga eskwelahan mamahimong magamit sa mga local government unit (LGUs) isip quarantine facility hangtud sa Hunyo 15 niining tuiga.
Kini human nga nitugot ang Department of Education sa Central Visayas nga lugwayan ang paggamit sa maong mga classroom gikan sa Mayo 31 ngadto sa Hunyo 15, 2020.
Gikatahong 21 sa 44 ka lungsod sa Probinsiya sa Sugbo ang nigamit sa mga eskwelahan isip isolation center sa mga Persons Under Monitoring (PUMs) ug Person Under Investigation (PUI) subay sa Memorandum of Agreement (MOA) tali sa LGU ug sa school division office.
Si Gobernador Gwendolyn Garcia nakigtagbo kini sa mga opisyal sa DepEd nga gipangulohan ni Salustiano Jimenez, regional director sa (DepEd)-7 niadtong Mayo 19, 2020 diin ilang gihisgotan ang paggamit sa mga classroom isip isolation centers.
Sa report sa Sugbo News, si Jimenez nagkanayon nga bisan og sa Agosto pa magbukas ang school year 2020-2021 ang eskwelahan gamiton kini sa mga magtutudlo sa enrollment ug training sugod sa Hunyo 1, 2020.
Si Jimenez nihangyo kini sa Department of Health (DOH)-7 nga mo isyu og certification nga ang eskwelahan nga gigamit nga isolation center covid-19 free na.
Kini alang sa kaluwasan sa mga maestra ug tinun-an.
Si Garcia nihangyo sa DepEd ug sa Commission on Higher Education (CHED) sa "learning continuity plan" hilabina nga daghan sa mga ginikanan ang nabalaka sa pagpabalik sa eskwelahan sa ilang mga anak tungod sa kahadok sa covid-19.
Si Jimenez nagkanayon nga aduna silay health protocols sa mga eskwelahan nga ipatuman inig balik sa eskwela ug nitanyag usab og online classes sa mga adunay internet connection. /BDB (BANATNEWS)