Pardo Police Station gi-lockdown

CEBU, Philippines — Lima ka mga dinakpan sa Pardo Police Station sa Cebu City ang napositibo sa novel coronavirus samtang sila dad-on na unta sa Cebu City Jail. Tungod niini, gi-isolate ang tibuok police station apil na ang mga polis niini.

Si Pardo Police Station chief Police Major John Kareen Escober miingon nga gipaubos sa isolation silang tanan kauban ang iyang 32 ka mga sakop.

Dugang pa ni Escober, niadtong Abril 28 gitugutan pa nila nga nakaduaw ngadto sa ilang mga dinakpan ang kabanay kay naghatud sila og pagkaon para nila.

Apan niadtong milabay nga semana nadawat na ang commitment order sa lima ka piniriso nga dalhon na unta sa Cebu City Jail.

Subay sa bag-o nga polisiya, kinahangalan nga ipaubos og swab testing ang tanan nga piniriso ayha pa sila dalhon didto sa Cebu City Jail sa Brgy. Kalunasan aron nga malikayan nga magtagod-tagod pa kini sa lain pang piniriso.

Tungod sa pagka-positibo sa lima nila ka dinakpan nagpaubos silang tanan sa iyang mga sakop niadtong Huwebes.

Apan ang 29 ka personnel ubos sa Pardo Police Station nga nadestino sa Quarantine Border Checkpoints dili na apilon ug dili lang una pabalikon sa police station. Sagad sa mga nadakpan nga nagpositibo adunay kasong illegal nga drugas.

Gawas sab niini, adunay mga polis gikan sa Regional Crisis Battalion ug sa CCPO nga patabangon pagbantay sa hurisdiksyon sa Pardo Police Station aron maoy mopadayon sa pagpatrolya ug police visibility.

Giangkon ni Escober nga naapektahan gyud ang ilang operasyon. /IBM (BANATNEWS)