Taga Mambaling, Alumnos midawat og mga hinabang
CEBU, Philippines — Nitunol ang Archdiocese of Cebu uban ang Cebu Caritas Inc. ug Commission on the Laity sa ilang ikaduhang hugna sa hinabang ngadto sa mga molupyo sa Barangay Mambaling ug sa St. Arnold Janseen sa Alumnos ning dakbayan sa Sugbo niadtong adlaw nga Martes.
Kini ang gitug-an sa chairman sa Cebu Caritas Inc. nga si Fr. Alex Cola Jr. kinsa nahinabi sa Banat News.
Matud pa ni Cola, 500 ka food packs ang ilang gihatod ngadto sa Barangay Mambaling nga gilangkoban sa bugas, delata, noodles ug facemask.
Sumala pa ni Cola, gawas sa Mambaling, gitunol usab nila ang hinabang sa ngadto sa molupyo sa St. Arnold Janseen nga naglangkob sa 10 ka sakong bugas, tulo ka karton nga delata ug lakip usab ang 500 nga facemask.
Miingon si Cola ng padayon pa sila karon nga namutos alang sa paghatag pa nila og dugang ayuda alang niadtong nanginahanglan.
Midugang si Cola nga padayon usab nanawat ang CCI ug COL og mga donations alang sa mga tawo nga nanginahanglan og tabang. /LPM (BANATNEWS)
- Latest
