CEBU, Philippines — Nangayo og dispensa ingon man pagsabot si Mayor Gerald Anthony “Samsam” Gullas Jr. ngadto sa mga Talisaynon nga nalangay ang ilang pagpanghatag sa tag 25 ka kilong bugas humay.
Iyang gipahibawo nga niadtong Mayo 5 nagsugod na gyud sila og hatud sa mga bugas sa pipila ka barangay samtang ang uban adto na gikuha sa City Hall kay lisud masudlan og dagkung sakyanan ang pipila ka lugar. Iyang giangkon nga naglisud gyud sila og hakot gumikan sa kadaghan ilabi na nga niabot kini og 80,000 ka sako.
“Lisud gyud ang pag-transport. I ask for your patience. Hopefully by next week the barangays can start distributing,” matud ni Gullas.
Si Gullas niingon nga bisan og dili botante mahimong makadawat sa bugas sama sa mga nag-abang. Apan ang mga singles pangitaan og laing duha ka singles o ba kaha daghan pa aron bahinon ang 25 ka kilong bugas aron maapod gyud sa tanan.
Samtang ang usa ka bubong nga adunay nagkalain-laing pamilya nagpuyo mahimong makadawat og 25 ka kilo gyud nga bugas. Asoy pa sa mayor nga nagsabot na sila niini sa mga kapitan.
Hangyo lang niya sa tanan nga sabton sab ang mga opisyal sa barangay kay naningkamot sab sila nga makaserbisyo.
Hinuon kung adunay mga pangutana mahimo ra gyud kini nga sabotan aron hapsay ang pagpanghatag sa ayuda. /GMR (BANATNEWS)