Balik-Loob Program gilusad sa gobiyerno

CEBU, Philippines — Ang gobiyerno nag-andam sa Balik-Loob Program alang sa mga sakop sa New People’s Army (NPA) nga mosurender o mobalik sa gobiyerno.

Kini maoy gibutyag sa hepe sa Task Force Cebu Bohol Siquior Army Colonel Jerry Borja bisan sa sunod-sunod nga pagpangatake sa mga sakop sa NPA.

Lakip sa maong programa ang livelihood ug edukasyon.

Bisan sa pagpatuman sa enhaced community quarantine (ECQ) tungod sa giatubang nga pandemic gikataho ang mga pagpangtake sa NPA ngadto sa mga Probinsiya sa Negros, Bohol, ug Samar.

Nikabat na sa pito ka sakop sa NPA ang nitahan sa gobiyerno sukad niadtong buwan sa Enero hangtud sa Mayo, 2020.  Matud ni Army Captain Cenon Pancito, tigpamaba sa 303rd Army Brigade sa AFP nga ang maong mga nitahan mga batan-on ug tigulang.

Ang bag-ong nitahan gikan kini sa Dakbayan sa Iloilo diin adunay upat sa kinatibuk-an sa Panay Island ug tulo gikan sa Negros Island.

Gibutyag ni Pancito nga ang mga nitahan kasagaran kanila NPA fighters.

Ang mga babaye kasagaran motahan kini kong magsabak tungod sa kalisod sa ilang kahimtang ngadto sa bukid.  Gikatahong walo na usab ang nasikop sa 303rd Brigade sa Central Command of the Visayas.

Subay niini, padayon ang panawagan sa kasundalohan ngadto sa mga sakop sa NPA nga motahan na sa gobiyerno. – Sheriza Mae R. Uy/BDB

600 na ka pamilya nahatagan og hinabang sa kapolisan

Nikabat sa 600 ka pamilya ang kinatibuk-ang nakabenepisyo sa Kapwa ko Sagot ko Program sa Philippine National Police.

Niining ulahi lang, laing 100 ka pamilya sa Barangay Bonbon, Dakbayan sa Sugbo ang nahatagan og hinabang sa Cebu City Police Office (CCPO).

Ang direktor sa CCPO Police Colonel Josefino Ligan ang nangulo sa pagpanghatag og hinabang sa bukirang bahin sa Barangay Bonbon.

Uban sa pagpanghatag og hinabang ang advisory council chairman sa CCPO Alfredo “Pido” Tan.

Ang hinabang nga gipanghatag ngadto sa  matag pamilya gilangkuban sa lima ka kilong bugas, groceries ug usa ka tibuok nga manok.

Ang Barangay Bonbon napili sa kapolisan nga hatagan og hinabang tungod kay  mao kini ang usa sa labing layo nga barangay sa Dakbayan sa Sugbo.

Ug gumikan sa enhanced community quarantine ang mga molupyo sa lugar maglisod og pamalit sa ilang mga panginahanglanon diha sa sentro tungod kay walay sakyanan nga makabiyahe ilabi na ang mga motorsiklo o habal-habal.

Nunot niini, Duha usab ka barangay sa Lungsod sa Santander ang nahatagan og hinabangan gikan sa Cebu Provincial Police Office (CPPO).

Pinangulohan sa direktor sa CPPO Police Colonel Rhoderick Mariano 500 ka pamilya ang nahatagan og hinabang diha sa Barangay Bunlan ug Cabutungan nga mga bukirang mga barangay sa nahisgutang lungsod.

Ang maong gipanghatag nga hinabang ngadto sa mga kabus gikan kini sa pundo sa kapolisan sa CCPO ug CPPO. /BDB (BANATNEWS)