CEBU, Philippines — Ang molupyo sa Barangay Tabok, Dakbayan sa Mandaue kinsa boluntaryong nipaubos sa gipahigayong rapid test sa kagamhanan sa siyudad ang gihatagan og duha ka kilong bugas.
Si Tabok Barangay Captain Dario Tariman nibutyag nga 700 ka pangalan ang ilang nalista nga ang kadaghanan mga vendor sa ilang satellite market ug mga trabahante.
Ang pagpaubos sa test giingong maoy rekisitos sa pagbalik sa mga trabahante sa ilang trabaho.
Si Tariman niklaro nga ang pagpaubos sa rapid test dili maisip nga mandatory hinungdan nga ilang hatagan og duha ka kilong bugas ang mga niapil niini.
Sa nasayran diha sa Barangay Pagsabungan sa maong dakbayan ang mga opisyal a barangay maoy nag-una sa pagpaubos sa rapid test.
Bisan pa niini, sa kapin 600 ka mga molupyo nga ilang nalista ang 211 lang kanila ang nitunga alang sa rapid test. Giingong ang uban gibati og kahadlok nga takboyan sa coronavirus (covid-19) human sa ilang pagpa-rapid test. /BDB (BANATNEWS)