CEBU, Philippines — Giklaro ni Cebu City Councilor Antonio Cuenco nga dili siya supak sa gipahigayong rapid mass testing sa kagamhanan sa dakbayan sukwahi sa nanggawas nga report nga giingong wala siya makauyon sa maong programa.
Sumala pa niya, dako siyang uyon sa pagpahgayon sa rapid mass testing alang sa coronavirus disease 2019 (COVID-19) subay sa Project Balik Buhay (PBB).
“I am not crazy to object to this…. 100 percent ko nga uyon ining rapid mass testing. Pakaayo man ni sa tanan. Asa man ta padung kung wala kini?” sigun niya.
Giasoy ni Cuenco ang iyang sentimento sa regular session sa City Council kaniadtong Miyerkules, Mayo 6.
Matud niya, ang rapid mass testing, nga gikatakda sugod Mayo 6 hangtod Mayo 15 sa mga barangay kinahanglan gyud buhaton.
Gipasabot niya nga adunay pipila ka mga pangutana bahin niini ug siya mismo nagpangutana lamang adtong tungora apan sumala niya wala kini magpasabot nga supak siya pagpahigayon niini. Sa maong sesyon, nanguatana si Cuenco kun unsaon pagpili ang mga tawong ipaubos niini. Sa sayo pa, giingong nga bisan kinsa sa usa ka banay ang ipaubos niini.
Kagahapong adlawa, ang mga residente sa barangay Punta Princesa, Kinasang-an, and Apas ang gipaubos niini.
Miabot og 219 ka tawo ang nagpaubos sa rapid mass testing sa maong tulo ka barangay. Ang 119 niini gikan sa Barangay Apas, 80 sa Barangay Punta Princesa, ug 20 sa Barangay Kinasang-an.
Ang PBB usa ka lakang pagkombate sa COVID-19 pinaagi sa matigom nga mga ebidensya ug data bahin sa gidaghanon sa mga nataptan niini ug kun asa sila dapit namuyo nga mga barangay.
Pinaagi niini, kini maoy basehan sa siyudad kun magpadayon ang enhanced community quarantine (ECQ) status o paubsan ngadto sa general community quarantine (GCQ).
Si Mayor Edgardo Labella una nang namahayag nga dili kini pugsanay kay boluntaryo kini sa tawo ang pagpaubos sa maong test. /IBM (BANATNEWS)