Gwen nibahad og liquor ban

CEBU, Philippines — Dili magduha-duha si Gobernador Gwendolyn Garcia nga mopatuman og liquor ban tibuok Probinsiya sa Sugbo karong panahon sa Enhanced Community Quarantine.

Kini kun magpadayon ang uban nga molapas sa protocol sa ECQ sa probinsiya ilabi na sa social distancing

Si Garcia nakadawat og taho nga adunay grupo sa mga lalaki ang nag-inom sa Barangay Basdiot, Moalboal atol sa piyesta.

Ang panag-inom adunay hulagway nga gi-upload sa Facebook nga nakita sa gobernador kinsa wala nalipay sa gihimo sa grupo nga nilapas sa iyang executive order ug ordinansa sa social distancing ug likayan ang panagtapok tungod sa hulga sa coronavirus disease.

“Wala baya ko nideklarar og liquor ban sa Province of Cebu, daghan baya mo nalipay pero niingon sad ko adto ra mo sulod sa balay ayaw mo panumbalay. Ayaw mo pagpundokay diha, social distancing lagi ta. Unsa man ni nahitabo nga pwerte man ning pagkapundoka,” matud ni Garcia.

Walay liquor ban nga gimando ang gobernador apan adunay ubang local government units ang nipatuman niini sama sa Dakbayan sa Bogo. /GMR (BANATNEWS)