CEBU, Philippines — Dugang hinabang gihatag sa Archdiocese of Cebu uban ang Cebu Caritas Inc. ug Commission on the Laity ngadto sa usa ka libo kapin ka pamilya sa Sitio Zapatera, Barangay Luz niadtong Huwebes sa buntag nga gipangulohan ni Fr. Alex Cola Jr., ang pangulo sa CCI.
Matud ni Cola nga ang donasyon naglangkub sa lima ka kilos nga bugas, de lata, alcohol, sabon pangkaligo ug panglaba lakip usab ang shampoo.
Mapasalamaton si Cola sa tanang nipaambit sa ilang ayuda para sa mas labing nanginahanglan ug nitug-an nga bukas gihapon sila modawat sa gustong motabang.
Ila na usab karon gilantaw ang pagpaabot usab og tabang sa Sitio Callejon, sa Barangay Labangon ug Cebu Provincial Detention and Rehabilitation Center.
Samtang si Konsehal Tito Durano sa Barangay Luz mapasalamaton sa ayuda nga nadawat nila sa simbahan ug daku na kaayo kining tabang sa mga residente sa Sitio Zapatera nga apektado kaayo sa COVID-19.
Gitug-an ni Durano nga ang maong ayuda ikaduha na kini nga hugna nga nadawat sa mga residente. /GMR (BANATNEWS)