Magpalaupad og tabanog dakpon

CEBU, Philippines — Higpit nga gipahimangnoan sa kapolisan sa Lapu-Lapu City Police Office (LLCPO) ang mga molupyo sa kabarangayan nga likayan ang pagpalupad og tabanog kun ugaling dili man kini buot nga masugamak sa pagkabalhug sulod sa ilang detention cell.

Kini ang gipahibawo ni Police Colonel Clarito Baja, director sa LLCPO, nunot ang pagpasabot nga ang pagpalupad og tabanog mao usab ang hinungdan sa mga kadaut sa palibot sanglit kuyaw man nga masabod sa kuryente nga makaingon sa brownout.

Matud ni Baja nga bisan kun walay gipatuman nga ordinansa ang kagamhanan sa Dakbayan sa Lapu-Lapu nga nagdili sa pagpalupad og tabanog apan angay nga mahinumduman sa mga Oponganon ang gipatuman nga enhanced community quarantine (ECQ) isip pamaagi sa pagpugong sa pagkuyanap sa coronavirus disease 2019.

Gitataw niya nga gipatuman sa lokal nga kagamhanan sa Dakbayan sa Lapu-Lapu ang 24-oras nga curfew ug pinaagi sa executive order nga gipatuman ang makahimo og kalapasan mahimo kining sikopon ug pasakaan og kaso sa korte.

Mahimo lang kining makagawas kun makabayad na sa ipahamtang nga multa.

Dugang pa ni Baja nga ang pagdili sa pagpalupad og tabanog mao usab ang gihangyo sa Mactan Electric Company (MECO) ngadto kanila isip paglikay sa pagkaputol sa supply sa kuryente nga mahitabo kun masangit na ang gipalupad nga tabanog niini.

“We are calling on those flying kites here in Lapu-Lapu City to stop as we really need to strictly observe the ECQ and in doing so, we can also help the power utility company provides no disruption of electricity supply,” matud ni Baja.

Sa kalapasan sa curfew ug sa gipatuman nga ECQ, ang mga madakpan ang mag-atubang og silot nga pagbayad og multa nga P1,000 alang sa unang higayon, P3,000 sa ikaduha o P5,000 alang sa ikatulo o pagkatanggong sa sulod sa bilanggoan nga labing ubos sa unom ka buwan. /GMR (BANATNEWS)