123 COVID-19 sa Cebu City Jail
CEBU, Philippines — Padayon nga nagsaka ang gidaghanon sa kaso sa coronavirus disease sa Cebu City human kagahapong adlaw natala ang labing daghang bag-ong kaso nga 139 kabuok.
Si Mayor Edgardo Labella nipahibawo nga sa 139 ka bag-ong kaso, 123 niini gikan sa Cebu City Jail, siyam sa Barangay Labangon, tulo sa Barrio Luz, usa sa C. Padilla, usa sa Kasambagan, usa sa Inayawan ug usa sa Cebu City Health Office.
Matud ni Labella nga resulta kini sa mass testing sa tibuok siyudad.
Samtang ang fish port sa Barangay Suba niadtong Martes hangtud kagahapon ang gi-disinfect human dunay usa nga nagpositibo sa maong lugar.
Si Barangay Kapitan Jojo Sable niasoy nga kaganehang kaadlawon nakatinda na og balik ang mga negosyante sa dapit human sa disinfection nga gihimo.
Apan si Sable niasoy nga ang gihimo nila wala nay makasulod sa dapit nga mopalit lang og tag usa o duha ka kilo nga isda ug ang tugutan kadtong binulto ang paliton aron pagkontrol sa mga tawo nga mosulod.
5 sa Lapu-Lapu
Sa Dakbayan sa Lapu-Lapu, 18 na ang natala nga kaso sa COVID-19 human nga adunay laing lima ka swabs ang positibo kagahapong adlawa.
Matud ni Mayor Junard "Ahong" Chan nga ang Barangay Looc adunay duha ka kaso samtang ang Barangay Babag, Marigondon, ug Gun-ob ang adunay tag-usa ka kaso.
Walay bag-ong natala sa nga positibo sa COVID-19 sa Dakbayan sa Mandaue kagahapon.
Niadtong Martes ang labing ulahing natala sa Sitio Sili, Barangay Cambaro nga maoy nadugang sa siyam nga kinatibuk-ang gidaghanon ug duha ang hingpit na nga naka-recover. Le Phyllis F. Antojado, Romeo T. Limpangog/GMR (BANATNEWS)
Related video:
- Latest
