CEBU, Philippines — Sa may Fuente Osmeña Circle sa taga Bureau of Jail Management and Penology ang pagkaon nga buot ipadala sa mga kabanay sa mga piniriso sa Cebu City Jail.
Kini aron malikayan nga mokatap ang coronavirus disease sa Cebu City Jail human dunay piniriso ug jail officer ang nagpositibo.
Matud ni Konsehal Dave Tumulak, pangulo sa committee on disaster risk reduction and management, nga niadtong Lunes nagtagbo ang mga warden sa Cebu City Jail Male ug Female Dormitory ingon man sa Cebu Provincial Detention and Rehabilitation Center (CPDRC) ug mga opisyal sa Barangay Kalunasan alang sa lakang nga buhaton aron malikayan ang pagkatap sa maong virus.
Nauyonan nga idili una ang pagbisia sa mga pamilya sa mga piniriso aron maprotehian ang mga piniriso ug dili mameligro ang katawhan nga nagpuyo duol sa pasilidad.
Ang mga tambal, vitamins, pagkaon, sabon, shampoo, toothbrush, toothpaste ug mga hangyo sa mga piniriso gikan sa ilang pamilya usahon ra kini og karga sa sakyanan sa BJMP padulong sa prisohan.
Pasalig sa BJMP
Samtang gipasalig sa BJMP nga dili makakatap sa sulod sa prisohan ang maong sakit.
Matud ni Jail Senior Inspector Jay Ylanan nga ilang i-monito pinaagi sa pagpatuman sa social distancing ug pag-monitor sa ilang pagpanglimpyo sa lawas ang mga piniriso.
Bisan anaa sulod sa prisohan gimanduan sa BJMP ang tanang piniriso nga magsul-ob og facemask.
Gipanghatagan sab ang mga piniriso og bitamina aron sa pagpalig-on sa ilang mga immune system aron dili dali takbuyan sa sakit.
Ang sudlanan sa pagkaon nga idunol sa kabanay sa mga piniriso ang i-disinfect sab.
Si Ylanan kinsa usa ka doktor nipasabot nga sa panahon sa ting-init motumaw gyud ang sakit sama sa influenza-like illness nga usa sab nga gibantayan pag-ayo ilabi na nga nagpadayon ang pakigbatok sa COVID-19.
Samtang ang mga nagpositibo nga personnel sa BJMP gibutang na sab sa isolation facility aron ipaubos og quarantine ug giistrikto nga gi-monitor sa mga doktor.
Adlaw sa dunol
Ang dunol sa City Jail Male Dormitory gikan sa Martes, Huwebes, Sabado ug Domingo, sa Female Dorm sa Martes ug Miyerkules samtang sa CPDRC sa Lunes ug Martes gikan sa alas 8 sa buntag hangtud alas 12 sa udto.
Gitug-an ni Tumulak nga dili na sab pasudlan ang Barangay Kalunasan sa mga dili residente.
Gipahibawo sab ngadto sa mga residente sa Oprra, Kalunasan ug Guadalupe nga dawaton ang ilang dunol sugod karong Huwebes sa Fuente Osmena Circle na sab human adunay mga nanglimbong nga residente sa maong lugar.
Kagahapon sa buntag ang mga gustong magpadala og pagkaon, bitamina ug uban pa sa mga piniriso naglinya sa may Fuente Osmeña Circle.
Ang mga gamit nila lakip ang kwarta gisusi og maayo ug gi-disinfect usab sa mga sakop sa BJMP.
Usa sa nilinya mao ang 57-anyos nga si Estrella Becbec kinsa ang iyang igsuon nabilanggo sa City Jail nabalaka dihang nasayud nga dunay nagpositibo sa COVID-19 sa pasilidad.
Uyon ra sab kini nga ang BJMP personnel na ang modunol sa ilang mga ihatag sa mga kabanay nila nga naa sa prisohan. Decemay P. Padilla ug Sheriza Mae R. Uy/GMR (BANATNEWS)